Anne Marie Proveyer-Groot, director di Departamento di Enseñansa:
ORANJESTAD (AAN): Un studiante cu ta aplica pa un Arubalening of cu ta bay cu DUO lening tin nan diploma cu ta nan base, cual ta un HAVO, VWO of EPI diploma y nan ta wordo acepta na scolnan na Hulanda, Anne Marie Proveyer-Groot, director di Departamento di Enseñansa a splica.
Hopi biaha ta sosode cu despues un par di luna ta cambia di opleiding, pasobra nan ta sinti cu e no ta locual nan ta desea of nan ta hay’e dificil.
Loke e studiantenan no ta tene na cuenta ta cu nan ta creando un debe. Despues di 1 aña, nan ta bay studia un otro opleiding y bou di Aruba lening por haci 1 cambio 1 biaha so, dus nan no por keda cambia caba biaha, pasobra e placa no ta yega pa studia 8, 9 of 10 aña.
Unbes e studiantenan caba nan opleiding y nan bin bek Aruba, hopi di nan ta pensa cu nan por haya trabou cu nan diploma, pero e ta depende di kico nan a bay studia. Un ehempel ta Edward Cheung cu a studia pa traha na NASA y na Aruba no tin NASA.
No ta tur opleiding cu haci nan por haya trabou p’e aki na Aruba y studiantenan mester tene esaki hopi bon na cuenta. Cierto scolnan manera MAVO, Colegio y EPB tin un programa cu yama Loopbaan Orientatie cu ta pa yuda determina kico e futuro carera di un studiante ta bay ta.
Segun Proveyer-Groot, diplomanan di Aruba te ainda ta wordo reconoci y esey tin di haber cu te ainda ta haciendo examennan di Hulanda. Mirando con e sistema di enseñansa ta bayendo, mester bay over na busca otro forma pa laga e studiantenan haci examen.
Tin diferente forma awor pa termina cu scol secundario y cu e diploma ey e studiante ta wordo acepta na Hulanda y otro paisnan. Hulanda actualmente ta haci e proceso di evalua un studiante su profiel y diploma, ademas di otro rekisitonan, pa determina si e por drenta un universidad.
