Home Comercio Taxistanan den desacuerdo cu cambionan den e regulacion cu DTP a haci...

Taxistanan den desacuerdo cu cambionan den e regulacion cu DTP a haci sin puntra

52
0
SHARE
- Advertisement -

Despues cu tur cos a keda cla cu Minister:

ORANJESTAD (AAN) — Union di taxista y Taxi Central di Aruba a tene un conferencia di prensa, cual a tuma lugar na Kowloon Restaurant, Diamars mainta.

Sra. Blanca Orman, vocero di ambos organizacion a hiba palabra y a splica e motibo di e rueda di prensa aki, cu ta un diferencia di opinion cu nan tin cu Departamento di Transporte Publico (DTP).

El a menciona cu enberdad nan a keda cla cu Minister di Transporte encuanto e tarifanan, pero nan a ripara cu den e regulacionnan cu na ultimo ora DTP a entrega nan, tin cambionan den dje siendo cu esey no tabata e afspraak.

E dama kier a refresca nan memoria, bisando cu e lista di prijs y e regulacionnan a pasa caba den man di dos minister di Transporte, esun anterior y e actual. Nan a bay door di dje, atrobe cu Minister Romero, recientemente, y a splike cada punto, pakico nan a hacie asina ey y cu cada articulo tin su ley cu ta respalde.

E dignatario a bay di acuerdo, y despues nan a bay negocia riba e tarifanan ken a haci un cambio chikito. E ora ey e lista di prijs mester a bay pa sr. Thiel di DTP pa hacie oficial y taxistanan mester a wak’e prome cu wordo oficializa, pero esaki no a sosode. Nan a haya e prijs despues cu a wordo oficializa y cu cambionan riba dje cu no tabata palabra.

E dama a subraya cu aparentemente e taxistanan tin dos ministerio riba nan. Esun di Minister Romero y esun cu ta riba su mes di DTP.

Sra. Orman a señala cu na aña 2009 ora nan a entrega e lista di prijs, esaki a wordo aproba e prome biaha, pa Prome Minister Eman e tempo ey, y Minister de Meza, pero ora el a yega DTP el a bira haci full un otro cos y tire den lashi. Pa fin di aña a surgi un bruhamento, y Minister Romero no tabata sa pasobra sr. Thiel tampoco a informe cu e lista di prijs tabata cerca nan den lachi hinca, y e ora ey e organizacionnan di taxista a para tur cos y a sinta na mesa cu e mandatario y eynan nan a bin cu e lista di prijs di 2018-2022.

Nan mester a ahusta esaki mihor pasobra nan tabata sa cu e aumento di BBO, BAZV, BAVP, tabata biniendo tambe. Nan a ahuste anticipando na e aumento di e impuestonan aki, y e lista ta mas update locual a sosode den pasado.

Sra. Orman a indica cu ta mas cu claro cu semper e taxistanan a bay atras y cu nan tabata tin 9 aña sin ahusta nan tarifanan y esaki ta un punto hopi cardinal negociando na mesa.

Dia 15 di Mei nan a entrega e lista di prijs completamente cla na Minister Romero, cu e mesun regulacionnan, y dia 2 di Juli a wordo aproba pa DTP oficializa esaki.

Pa sorpresa di e taxistanan, despues cu a palabra cu nan lo mira e lista prome cu e bira oficial, esey no a sosode. Sra. Orman a haya Diabierna atardi 4 or y el a yama un reunion cu e grupo, y e ora ey nan a bin ripara cu cambionan a wordo haci sin cu nan tabata na haltura di dje. E ta haya cu esaki ta un falta di etica.

E dama a señala cu si tabata e, otro gai lo a canta, pero e ta Minister Romero su Departamento y e mester sa con pa handle cune, y el a compare cu un director di orquesta e no por laga otro hende dirigi’e pe.

Nan a puntra Minister si lo tin mas cambio y el a bisa nan cu no. Thiel tambe a confirma cu solamente e lo cambia loke a wordo haci e dia anterior.  Y e ta puntra di con a haci mas cambionan cu tabata tin e dia anterior anto sin avisa nan.

El a keda cu e minister cu e lista lo keda cla den un luna, y asina a sosode pasobra e ta un persona di palabra, sra. Orman a subraya.

E cambionan cu e taxistanan no ta acuerdo cune ta den e regulacionnan. Por ehemplo di hinca mas turista banda di esnan cu a subi taxi caba na Aeropuerto pa bay hotel, anto sin puntre si e ta di acuerdo of no, locual no ta etico, pasobra mester tin respet pa e guest cu ta ocupando e taxi caba.

Pero den e cambio di e regulacionnan haci pa DTP nan a pone pa hinca mas hende pa share y pa nan share e prijs cu otro. Kiermen DTP ta tumando decision den e negoshi, den e propiedad di e taxista, pasobra e taxi ta di dje, y e tin derecho di nenga y e pasahero tambe pasobra e ta paga pa e servicio.

- Advertisement -

DUNA COMENTARIO

Please enter your comment!
Please enter your name here