Home Hudicial Tilico condena na 15 aña di prison pa a tira mata homber...

Tilico condena na 15 aña di prison pa a tira mata homber na Rooi Bosal

514
0
SHARE
- Advertisement -

E ta culpable di asesinato y intento di asesinato

ORANJESTAD (AAN): Diabierna mainta e homber I.L. conoci como Tilico di 29 aña di edad, a scucha Hues confirma e exigencia di Fiscal y a conden’e na 15 aña di prison y cu e mester paga mas cu 9 mil Florin di gastonan di entiero.

Hues ta haya Tilico L. culpable di asesinato di Edward Thiel riba 23 di Februari 2018 y tambe intento di asesinto di e ruman di Edward Thiel, E.T.(Dito).

 Tiramento door di vest contra bala:

Tratamento di e caso aki a tuma lugar luna pasa dia 22 Juni 2018, caminda Hues a mustra cu for di investigacion di Recherche por conclui cu tabatin un grupo di persona ta bebe pafor y Tilico L. a bay bisa nan pa bay cu e vest contra bala otro caminda. A surgi un discusion entre Tilico L. y Edward net dilanti cas di Tilico L. na Santa Cruz.

Na dado momento nan a cuminsa pusha otro y Tilico L. a bay paden, sali cu un pistol y los algun tiro. Ora cu Edward a bay riba dje, el a tira Edward den pecho riba distancia hopi cortico cu consecuencia el a fayece. Despues e ruman Dito a sali for di auto y bay reclama Tilico L. pakico a tira Edward. Tilico L. a bringa cun’e y a tira riba dje.

Despues Tilico L. a bay den mondi y sconde e arma den un cadushi. E arma tabata lora den paña. Segun Tilico L. e ta lamenta loke el a haci.

Hues a puntra Tilico L. si e ta realisa cuando daño el a causa den “one split second”. Segun Tilico L. el a worde lanta sin tata y su mama a fayece tempo e tabata chikito. Ta door di famia el a worde lanta. Hues a bisa cu e ta compronde.

Exigencia di fiscal:

Fiscal a bisa cu e ta haya legalmente proba cu Tilico L. a tira mata Edward y purba mata Dito. Mata un hende ta e delito di mas serio cu por sosode. Awor e famia mester biba sin nan ser keri. Fiscal no ta mira ningun motibo pakico Tilico L. a bay coy arma y tira mata y purba mata e ruman di e victima.

Fiscal a tene cuenta cu e carchi di castigo di Tilico L. riba cual tin dos sentencia di posecion di arma di candela. Na opinion di Fiscal, diferente biaha a bati riba Tilico L. su dede pa arma pero toch e no a stop. Awor el a bay asina leu di tira mata. Fiscal a exigi 15 aña di prison.

Fiscal a pidi Hues pa aproba demanda di Dito di 1.200 Florin. Tambe pa aproba gastonan di entiero di mas di 9 mil Florin. E otro demandanan, entre otro alimentacion pa e yiu di e difunto, ta bira fastioso. Fiscal ta kere cu lo mester haci un caso civil.

Sentencia:

Diabierna mainta e famianan di e Edward Thiel y conocirnan tabata presente den sala di Corte, mientras cu den e parti ariba di tribuna tambe tabatin hende. Hues a bisa cu e ta haya Tilico L. culpable di a asesina Edward Thiel y purba asesina Dito ruman di victima. Hues a sigui bisa cu e lamentable hecho aki a conmove henter comunidad. Esaki ta algo hopi grave. A kita bida di un persona door di tir’e cu pistol.

Pa loke ta demanda di daño, Hues a bisa cu no por aproba e demanda di daño di Dito y otronan pasobra no a demostra esaki riba documento. Hues a declara esakinan no admisibel pero cu por bay haci un caso civil. Hues a sigui cu e ta aproba e demanda di daño pa cubri gastonan di entiero cu ta mas cu 9 mil Florin. Hues tambe a pone e medida di pago o sea cu Ministerio Publico lo mester percura pa Tilico L. paga y si e no paga, e lo bay mas tempo sera.

Castigo:

Hues a bisa cu e ta haya e exigencia di Fiscal na su lugar. Hues a condena Tilico L. na 15 aña di prison, kitando e tempo cu e ta sera den KIA. Ta parce cu Tilico L. tabata prepara pa e castigo aki. El a baha su cabez un rato y despues a actua normal.

- Advertisement -

DUNA COMENTARIO

Please enter your comment!
Please enter your name here