Home Gobierno Tin hopi presion di Hulanda pa revisa e protocol di 2001 tocante...

Tin hopi presion di Hulanda pa revisa e protocol di 2001 tocante RST

504
0
SHARE
- Advertisement -

Minister mr. Bikker:

ORANJESTAD (AAN) — Minister di Husticia mr. Andin Bikker, a referi den conferencia di prensa, na un punto di agenda cu lo wordo trata den reunion di ministernan di Husticia otro siman na Bonaire, y tocante cual tin diferencia di opinion cu ta esun di Recherche Samenwerkings Team (RST).

Minister Bikker a señala cu el a hereda un situacion unda su predecesor, ex-minister Dowers, na Januari 2017 a propone pa revalua un protocol di 2001.

El a indica cu e punto di agenda aki ta hiba su mesun bida, y aworaki el a confronta cu tin hopi presion di parti di Hulanda pa yega na un acuerdo nobo riba esaki. Un presion cu e dignatario no ta compronde.

El a duna di conoce cu, en todo caso, tin un reunion urgente cu e Comision di Husticia di Parlamento, pa por atende cu e tema aki, pasobra tin un documento cu yama “Notitie” cu ta mas amplio cu e protocol mes, cu tin yen di detaye den dje, cu en todo caso, e mandatario no por premira cual ta tur e consecuencianan. Minister mr. Bikker a manda email y hopi corespondencia a bay bin, cu su colega di Hulanda pa por a wak si por a yega na un acuerdo tanten.

E dignatario su opinion ta cu nan mester duna otro un espacio y e tema aki por warda pa Januari, pero aworaki e ta bay consulta cu Parlamento pa wak kico ta gevoel di Parlamento riba e tema aki, pasobra na final di dia Aruba tin un aprecio pa combatimento di crimen organiza, y preveni esaki pasobra e no ta para na frontera pero tin dimensionnan cu ta cruza esaki.

Pa añanan largo Aruba a coopera den Reino y pafo di dje pa combati y preveni criminalidad, cu ta traspasa frontera, y gobierno ta habri pa sigui papia riba e tema aki y yega di extende e cooperacion pero e forma cu esaki mester wordo atendi cune eynan tin, respetuosamente, diferencia di opinion.

Pesey awe lo tin un reunion di Parlamento den Comision di Husticia pa e por haya sa e sentimento di Parlamento riba esaki, y tambe den Ministerrad lo toca e tema aki, pa delibera ampliamente riba dje, y asina otro siman ora e bay na e reunion di ministernan di husticia di Reino, por trata e punto di agenda aki.

E mandatario a subraya cu den e reunionnan aki na final di dia ta yega na un documento cu un lista di acuerdonan cu ta wordo poni den dje, y e kier sinti su mes cu e mandato di Gobierno y di Parlamento pa delibera riba e diferente temanan, y en todo caso riba esun di RST.

E mandatario a reitera cu su predecesor a propone na 2007 pa revisa e protocol, y na Juni-Juli 2017 no tabata tin movecion riba e tema aki, pero aworaki tin un presion enorme di parti di Hulanda pa yega na e punto aki, y e dignatario no ta compronde di con tin tanto pura den esaki.

Pero ta Aruba esun cu a propone e punto di agenda aki y aworaki diripiente tin hopi presion pa propone un acuerdo pa revisa integralmente e protocol di 2001.

Minister Bikker a subraya cu no por lubida cu Aruba tin su autonomia, su Status Aparte, cu nos tur ta defende. Y tin otro paisnan den Reino cu ta Curacao y Sint Maarten cu tin otro tipo di cooperacion den cual Aruba no ta forma parti ni ta interesa den dje tampoco.

E mandatario a acentua cu e posicion autonomo di Aruba mester ta para dilanti den tur momento y tur discusion y esaki e ta adelantando y subrayando na Reino Hulandes, cu ora nan a dicidi pa desmantela Antiyas, Aruba a keda mantene su autonomia cu excepcion di Corte Comun.

- Advertisement -

DUNA COMENTARIO

Please enter your comment!
Please enter your name here