ORANJESTAD (AAN); Tormenta Tropical “Beryl” a desaroya Diahuebs mainta riba Oceano Atlantico, y merdia el a haya nomber.
E tabata como 2.000 kilometer Oost-Zuidoost di e Islanan den e parti oriental di Lama Caribe. Pues e ta mey-mey entre Africa y Caribe. Basa riba data di satelite, e tin bientonan sosteni na 64 km/h. Beryl a bira e di dos Tormenta Tropical di e temporda aki, pero nan ta calcula cu pa ora e yega Diadomingo cerca di islanan di Caribe, e lo debilita bek pa un Ola Tropical.
Pues pa awor, e avionnan Hurricane Hunters lo no bay ni investiga e tormenta. Kizas Diadomingo nan lo por lanta vuelo y check e tempo aki.
Imagen di satelite di Diahuebs atardi a mustra cu Beryl ta djis un tormenta chikito, cu solamente un parti chikito di thunderstorms. Tog e tormenta ta bon organiza, cu varios banchi spiral di nivel abao. Si e sigui bay su rumbo actual, e lo por yega Diadomingo den area di St. Maarten.
Actualmente Tormenta Tropical Beryl no ta un menaza pa Aruba. Pero tog Servicio Meteorologico lo sigui e desaroyo di e tormenta aki.
