Home General Traficacion di hende entre Venezuela y Aruba ta mas peligroso pa Aruba...

Traficacion di hende entre Venezuela y Aruba ta mas peligroso pa Aruba cu hende ta kere

119
0
SHARE
- Advertisement -

Ultimo simannan continuamente nos ta tende di e embarcacionnan for di Venezuela cu ta yega na nos costa cu hende, droga, arma y cu ta haya e embarcacionnan aki bandona.

Nos ta pensa hopi riba e transporte di hende cu ta bin busca un mihor bida aki, pero no ta pensa riba otro asuntonan cu ta peliger pa nos isla.

Bo ta mira con circunstancianan ta influencia situacionnan cu ta nada positivo. Corsou, Aruba y Bonaire ta sinti e afecto di e situacion desastroso crea na Venezuela pa un sistema di gobernacion cu aparentemente no a duna e exito cu nan a spera.

Hopi cos ta for di man y for di control, y tin hopi acusacion dirigi contra entidadnan cu un pais tin pa defensa di su pueblo, no pa detrimento di circunstancianan popular.

Awe mi ta publica tocante peliger cu tin riba lama grandi entre Venezuela y Trinidad, pero cu lo por ta tambe pa nos propio piscadornan, navegantenan di placer y contrabandistanan local.

E aña aki ainda, algun luna pasa,  InSight Crime  cu ta un fundacion dedica na estudio di e menasa principal di seguridad nacional y di ciudadania na America Latina y Caribe,  a publica un investigacion periodistico cu ta mustra con un habri chikito di awa (lama) entre costa oost di Venezuela y costa di Trinidad & Tobago a bira un asilo  peligroso pa piratanan y contrabandistanan criminal entre e dos nacionnan subrayando e consecuencianan di fracaso di Venezuela di controla e crisis economico y politico den e pais.

 

Bruki y cuminda ta manera bara di oro

 

E habri den lama caribense, di djis 10 miya hancho, Golfo di Paria, ta separa continente  di Venezuela di e nacion caribense Trinidad & Tobago,  y awor ta infesta cu piratanan y contrabandistanan cu ta negocia den bruki, droga, arma, cuminda, animalnan salvahe y hende, “Bloomberg” a reporta .

E rapport a examina con contrabandistanan ta haci negoshi den tur cos, di armanan di candela, vodka y gasoline.

A pesar di e inflacion masivo di Venezuela, gasoline ainda ta  un fraccion di e prijs cu tin cu paga na pompnan di gasoline na Trinidad.

Na Venezuela segun e rapport  a menciona, bruki y cuminda ta wordo almacena “manera ta baranan di oro”, Bloomberg a reporta.

Escases paralisante di cuminda a destroza Venezuela desde e inflacion masivo di e pais treciendo cune e protestanan masivo, y contrabandistanan den Golfo di Paria ta  saca ventaha di e demanda halto. Pa cita djis un ehemplo, un saco di 5 dollar (di Trinidad) di hariña tabata wordo bendi pa 20 dollar na Venezuela y awe lo ta hopi mas caro.

E contrabandistanan ta bende tambe arma —  hopi di nan cu ta bin di forzanan arma di Venezuela  — na gangnan pa decenas di mil dollar, sobornando miembronan di guardia nacional bolivariano di Venezuela cu dollarnan americano y brukinan “Huggies” pa trafica armanan di candela na costanan di Venezuela, segun e rapport.

Secuestro tambe ta lucrativo y  criminalnan reportadamente ta secuestra piscadornan pa placa di rescate, incluso un persona cu a wordo laga liber despues di a paga 46 mil dollar, segun Bloomberg.

A pesar cu canciyeria di Venezuela y Trinidad a tene negociacionnan bilaterial na November 2017 pa discuti normalizacion di fluho di articulonan y hende entre e nacion caribense y continente Venezolano, mercadonan ilicito a sigui prospera.

 

E analisis di InSight Crime

 

Si lesa mas aleu ta yega na analisis di InSight Crime cu ta menciona cu e mercado negro creciente den Golfo di Paria ta resultado di e estado prolonga di crisis economico y politico na Venezuela y cual a devasta un di e paisnan mas grandi di America Latina.

Criminalidad a dispara bay laira na Venezuela mientras  e gobierno ta lucha pa mantene poder mey mey di un situacion economico y seguridad  como e presion intensifica internacional.

Considera awor como un di e paisnan mas peligroso na mundo, homicidio y secuestro a bira dificil pa frena den e pais , y Caracas ta wordo considera awor como e ciudad mas mortal na mundo, segun e analisis.

Mey mey di e caos, gruponan criminal organiza nobo a lanta den prisonnan di e pais, den militarismo y riba cayanan den forma di gangnan mega y “colectivonan” – gruponan pro-gobierno arma pa gobierno. Hopi  “colectivo”  reportadamente a sali for man y ta descontrola .

Segun e analisis hasta gobierno y esnan mas cerca di e mandatario a wordo implica directamente di ta permiti y participa den actividadnan criminal.

Ta conoci di e dos sobrinonan di e president, kendenan a wordo califica como “narco sobrinonan” cu a wordo sentencia na 18 aña di prison na Merca  den intento di trafica y drenta Merca cu 800 kilo di cocaine , e analisis a termina cune.

E situacion di nos ta parce na un banda, masha leu mes comparable for di e situacion na Trinidad.  Pero tin cos cu mester tene cuenta cune.

Entre Venezuela y Trinidad no tin gran lama, cerca nos mes ta menos. Pone acerca cu Trinidad tin un situacion di criminalidad cu pa basta aña mester di atencion serio y cu ta mucho mas grave cu situacion di nos.

 

Lama ta guli y ningun hende sa mas

 

Ta trata di un pais, no di 130 mil hende pero di mas o menos 1.3 miyon hende.

Eynan tin pues hopi mas gang, criminal, hopi mas tanto tur sorto di cos y piscadornan tambe,.

Piscadornan cu ta gana nan cent y nan pan di cada dia tin den nan cu a ripara cu tin un negoshi hopi mas lucrativo cu simplemente sali di cas coi algun cos bin paden bende,  come etc.

Nan ta haya un pais masha grandi cu como 32 miyon hende incluyendo cantidad di hende di ehercito  pa haci tur sorto di deal, negoshi y transaccion cu por ta di beneficio y pa colmo cu divisas, pero un circusntancia unda di berdad tin masha drama, manera e situacion venezolano ta. 

Bo tin pues un recept perfectamente bon traha pa fomenta actividadnan criminal, na gran escala y di gran envergadura, di gran importancia y di gran pena y dolor pa esnan cu resulta victima.

Ya no ta papia di contrabando simplemente aunke ta papia di contrabando di remedy, bruki, arma, muher, y hasta di pirateria.

Di hende cu ta sali cu boto sea di Venezuela of for di Trinidad, subi lama, probecha di cualquier circunstancia., e piscadornan di Trinidad cu ta bisa cu bo mester keda cerca di costa pa go-fastnan no alcansabo.

Nan ta kita tur cos di  bo y hasta bo motor di boto y bo boto of hasta kita bo bida tambe.  Lama ta guli y ningun hende sa nada mas.

Ademas di situacion di arma, segun un articulo di un medio periodistico internacional, bo ta haya circunstancia cu un miembro di Guardia Nacional of di ehercito venezolano cu ta bin cu arma caro cu nan por bende, por ehemplo un F.A.L., pa 47 mil dollar.

Tin figuranan di autoridad trinitario ta tuma e scopet y bende cu kende cu ta opera na Trinidad y ta dispuesto pa paga e tipo di cent ey pa e tipo arma ey.

Arma tin na Venezuela sigur y masha hopi. Ta menciona e mas o menos 1 miyon cu lo a cumpra ultimo tanto añanan, pero prome cu esey caba tabata tin masha hopi scopet y despues tambe a bin masha hopi scopet y tur modelo mes.

Anto e ora ta mira con ta probecha di e circunstancia cu Trinidad tin 1.2 of 1.3 miyon habitante cu ta haci’e Mercado di importancia, no e 130 mil cu nos tin na Aruba.

Esey no ta kita afo cu bo ta cuminza pensa , ma tin un of mas recibo den e traficacion di arma ey cu ta resulta na A.B. y C. ? Pakico no ?  Cu of sin un recibo pa proba, toch nos ta den un situacion di gran peliger.

                                                 Juby Naar

- Advertisement -

DUNA COMENTARIO

Please enter your comment!
Please enter your name here