Home Hudicial Traficacion di mas cu 300 kilo di cocaina den partinan bieu di...

Traficacion di mas cu 300 kilo di cocaina den partinan bieu di auto trata den Corte

369
0
SHARE
- Advertisement -

ORANJESTAD (AAN): Diabierna mainta e homber Venezolano R.S. a scucha Fiscal exigi 12 aña di prison pasobra Fiscal ta hay’e culpable di a exporta 357 kilo di cocaine den dos container. R.S. ta desmenti categoricamente di tin algo di haci cu e droga aki. DIARIO den e articulo aki ta publica con tratamento di e caso a bay y den un otro articulo ta publica e exigencia di Fiscal hunto cu e defensa.

TRAFICA DROGA DEN BODYPART DI AUTO:

Hues a mustra cu e departamento encarga cu haya informacion confidencial (CID) a haya informacion cu tin un persona cu ta deal den cocaine ta preparando 300 kilo di cocaine pa hiba Hulanda. E persona a hasta duna un number di telefoon. Desde November 2017 a cuminsa investiga caminda a bin compronde cu e persona lo kier transporta e droga den container A haya informacion cu ta un tal R.S. y R.M. lo ta transporta container pa Hulanda y den esaki tin droga scondi.

A base di esaki Hues Comisario a duna permiso pa scucha cellular. Ora a scucha e cellular a bin compronde cu ta R.S. E tabata papia cu e homber K. cu tin un compania di transporta carga aki na Aruba. Esaki tabata 5 December 2017 caminda lo tabata papia di 5 container.

Polis a papia cu Douane pa check si tin containernan cu lo bay Hulanda. A resulta cu ta asina y a confisca e containernan cu heru bieu, destina pa Hulanda y despues Antwerp. A detene K. y a interog’e y despues a lag’e liber. A investiga 2 container y a haya 30 porta di baki di pick up den cual tabatin 258 bloki scondi. E blokinan aki tabata tapa cu lood. En total e blokinan a pisa 357 kilo di cocaine.

A scucha Douane tambe pa haya sa kendenan tabata yena e containernan. A compronde cu cinco persona tabata yena esaki y R.S. tabata esun encarga cu e carga y e otronan ta e trahadornan.

Ta asina cu R.S. no kier a duna declaracion na Polis. Hues a mustra cu segun investigacion, na November 2017 caba a manda dos container y December tabata pa manda e otro tres. K. a admiti di a transporta e containernan pero no sa nada di loke tin den container. K. a bisa cu esey mester puntra Douane cu ta controla e containernan. El a bisa cu ta R.S. ta esun responsabel pa e containernan y cu e no sa nada di traficacion di droga. Si e tabata sa di esaki, e lo no haci’e. El a bisa cu Douane tur biaha ta controla e cargamento promer cu e worde hinca den containernan y despues Douane ta seya e containernan.

DROGA DEN CONTAINER SEYA:

Ta asina cu Douane a controla cu cacho anti droga e carganan promer cu hinca den container. Esaki tabata 6 December 2017. Dia 11 December 2017 a haya droga den e containernan aki. A constata cu e cosnan cu a haya droga aden, no tabata den e container promer y tambe a mira cu plachi di heru cu tabata poni mey mey awor ta te na e porta.

Douane ta sospecha cu despues di a seya e containernan, a habri esaki toch y hinca e portanan di baki di pick up cu droga. Douane a reconoce R.S. como esun responsabel pa tur e cargamentonan. E tabata hinca e carga cu “fork lifter” den container.

SOSPECHOSO TA DESMENTI:

Hues a puntra R.S. kico e tin di bisa di tur e acusacion aki. Segun R.S. nada cu e ta worde acusa no ta asina. Segun R.S. tur e hero bieu ta di K. El a bisa cu su palabracion cu K. ta cu e lo yuda K. yena containernan cu hero bieu y cu R.S. lo manda partinan di auto pa Venezuela. Segun R.S., ta K. ta esun cu ta cumpra e heronan bieu.

R.S. a bisa Hues cu varios biaha el a manda partinan di auto pa Venezuela. El a bisa cu e tabata manda nan via un boto y nunca el a manda container. Segun R.S. ta K. tabata dune placa pa paga riba containernan cu lo mester usa pa manda Hulanda. R.S. tambe a bisa cu e no tabata paga K. pa e partinan di auto. El a desmenti cu e tabata huur e tereno for di un tal B. El a bisa cu ta K. tabata usa e tereno ey y cu K. tabatin un persona cu ta habri y sera porta di e tereno.

R.S. a sigura Hues cu ora a carga e container, no tabatin portanan di baki di pick up. El a bisa cu tabatin miembronan di Douane cu a mira tur cos promer cu a hinca den container. Segun R.S., nan ta culp’e di algo cu e no tin nada di haci cu esaki. Hues a confronta R.S. cu potretnan y e ta desmenti di a carga e portanan aki den container. Hues a remarca cu hasta Douane ta bisa esaki. Hues ta puntra su mes, con e portanan aki a yega den container?

Hues a remarca pakico R.S. no a bisa Polis nada. Awor R.S. ta duna declaracion contradictorio cu ta bira fastioso pa bay investiga y confronta K. cu esaki.

Ta asina cu Fiscal a exigi 12 aña di prison y abogado mr. Lejuez ta cuestiona cu e investigacion ta misterioso y no por prueba cu e droga ta di R.S. El a pidi pa declara R.S. liber. Hues a bisa cu e ta bay studia e caso y dia 20 di Juli 2018 tin sentencia.

 

- Advertisement -

DUNA COMENTARIO

Please enter your comment!
Please enter your name here