Home Policial Tripnan ilegal riba boto tin su consecuencianan penal

Tripnan ilegal riba boto tin su consecuencianan penal

307
0
SHARE
- Advertisement -

Luis Kirindongo di Kustwacht:

ORANJESTAD   (AAN): Tripnan ilegal cu ta wordo haci, naturalmente ta traficacion di hende y hopi biaha ta sali esun cu kier yega nos isla basta caro, sea monetariamente of nan ta pag’e cu nan bida. Pa esaki Luis Kirindongo ta duna un splicacion con henter e proceso aki ta bay. Pa loke ta e botonan, e supuesto capitannan no ta para responsabel pa nan y den pasado por a bisa cu hasta tin hende cu ta perde nan boto, pa na final, bin haya sa cu nan ta wordo uza pa finnan ilegal. En todo caso, hopi biaha no tin e informacion pa sa precisamente for di cua fuente e botonan aki ta bin.

Ora yega asina leu, sea pa e hendenan haya nan boto bek, semper den e casonan asina, e hues cu trata e caso, e ta esun tambe cu e ta esun cu ta dicidi kico lo bay sigui pasa cu e boto. En todo caso, ora cu haya e boto, e ta wordo confisca pa Ministerio Publico y Kustwacht ta tuma esaki ter bewaring y ora cu e caso yega asina leu, ta tuma un decision kico precisamente ta pasa cu e boto.

 

Un santana yen

Kustwacht tabata tin un santana medio bashi, pero awo el a cuminsa yena atrobe. Kirindongo a splica cu nan accionnan ta tumando resultado, y ta pa e motibo ey e santana di boto ta yenando bek. Por duna credito tambe na esfuersonan combina cu ta tumando luga ultimo tempo. Tin un kustsurveillance cu ta Cuerpo Policial, combina cu Douane, cu tambe ta yudando cu e patruyanan riba tera. Poco poco pero sigur por mira con Kustwacht mes ta blend cu otro y stem af riba otro pa loke ta accionnan cu nan mes tin.

Tambe por cubri areanan mas grandi ora cu combina forsa cu otro. Ta mirando esey tambe su balor agrega. E hecho cu cuerponan ta bin hunto y ta traha hunto pa por back up otro. Por bisa tambe di maritiem Politie mes, cu hopi biaha ta un bon sosten pa kustwacht pa e parti di lama, pa asina por dek otro pa loke ta e trabaonan. Ta trahando acuerdonan cu otro, trahando cu otro cuerponan, intercambiando informacion y tambe sostene otro riba e tereno di operacion, por mira cu tin cierto resultadonan a tuma luga.

 

Proceso

Kustwacht a gara 4 boto y esey sigur ta manda un mensahe cla y raspa. Kirindongo a splica cu nos ta bibando den un mundo hopi dinamico. E ta un mundo cu bo mester keda hopi biaha “on the ball”. Abo tambe tin cu keda studia kico ta pasa rond dibo. Bo tin cu keda hopi skerpi riba kico ta pasando rond dibo. A base di informacionnan cu bo haya y locual cu bo ta mira, esta e modus operandinan, a base di esey bo tambe ta traha bo tactica y bo strategianan pa bo tambe por duna cierto resultado y esey Kustwacht a bin ta haci.

 

E radar ta dunando su fruto

Pa loke ta radar, e ta un aparato cu sigur ta yuda Kustwacht masha hopi mes den nan trabao. E ta un ayudo hopi grandi den nan trabao. Esey ta duna indicacion unda cierto cosnan ta y a base di e indicacionnan cu nan tin, nan por mobilisa y por haci nan trabao na un manera mas efectivo.

 

Resultado

E radar tabata tin un rol crucial den e ultimo temponan. Kustwacht ta bezig ta volg basta cos y esey tambe a duna cierto resultadonan cu nan a bin ta mira den delaster temponan.

 

Mensahe pa esnan cu kier sigui

Henter e cos aki tin riesgonan mara na dje. Riesgonan hopi grandi. Sigur e parti di siguridad riba lama, cu ya caba ta riesgonan hopi grandi cu e hendenan aki ta tuma pa cruza lama, pa yega Aruba cu botonan cu no ta adecuado. Por bisa cu hopi biaha no tin e ekiponan di siguridad na ordo riba e boto cu por garantisa cu si cierto cos pasa, bo no por salba ni bo mes pa yuda otro hende rond dibo. Si bo purba yega mas cerca, e chens pa autoridad gara bo tambe ta hopi grandi. Si autoridadnan gara bo, depende den ki posicion bo ta na e momento ey riba e boto, tin hasta persecucion penal cu por sigui hunto cu esaki. E otronan ta wordo deporta. Asina ey tin hopi cos cu ta bin rond di dje cu por bisa cu no ta recomendabel pa bo haci tipo di tripnan asina aki. E por sali bo hopi di malo, caminda cu bo libertad por wordo kita, pasobra bo a actua contra di nos leynan cu nos tin na Aruba y na momento cu bo wordo gara, tin cu procesa segun e leynan cu nos tin na Aruba. Castigonan tambe tey na nan luga, segun Luis Kirindongo.

 

- Advertisement -

DUNA COMENTARIO

Please enter your comment!
Please enter your name here