Home Hudicial 8 adicto ta declara cu nan a cumpra 5 aña droga na...

8 adicto ta declara cu nan a cumpra 5 aña droga na e cas unda sospechoso ta biba

467
0
SHARE
- Advertisement -

E sospechoso ta para riba cu e tin cancer y ta siguiendo tratamento

ORANJESTAD  (AAN) – E homber J.A.L. “Papo” ta para riba cu e no ta bende droga y cu e ta bayendo constantemente Santa Domingo pa su tratamento di cancer. Fiscal ta haya cu tin 8 adicto ta bisa cu ta for di e cas unda “Papo” ta biba, nan tabata cumpra droga. Abogado mr. Zara a remarca cu e partner di Papo tabata bende droga y a haya castigo di prison. E ta kere cu lo tin un bruhamento aki.

BENDEMENTO DI DROGA

E acusacion cu Fiscal a presenta contra Papo ta cu entre 2013 y 29 April 2018 e tabata bende cocaina. Fiscal a bisa cu e caso ta pro forma pasobra ta den e temporada di receso. El a propone 9 November 2018 pa tratamento di e caso.

ABOGADO: POR TIN BRUHAMENTO

Abogado mr. Zara a bisa Hues cu no a haya Papo cu droga. Dia 29 April 2018, autoridad a detene Papo na aeropuerto na momento cu e kier a viaha. E abogado a sigui bisa cu a base di declaracion di 8 adicto di droga a detene Papo pasobra nan a bisa cu nan tabata cumpra droga for di Papo pa un tempo. E abogado ta haya cu por tin un bruhamento aki. El a mustra cu e partner di Papo, un dama S.M., a wordo condena pa bendemento di droga na e cas aki. E dama lo a haya 12 luna di prison y entretanto a wordo laga liber. Papo ta desmenti categoricamente di ta bende droga.

SOSPECHOSO TA PACIENT DI CANCER

Abogado mr. Zara a bisa Hues cu Papo ta un pacient di cancer y ta hayando tratamento den exterior. E abogado a splica Hues cu Papo ta hayando tratamento na Santo Domingo. E abogado mustra carta di dokter cu ta mustra cu Papo no por wordo deteni. E ta haya cu ta mucho hopi pa Papo keda sera te dia di e caso. E ta haya cu no tin motibo di peso. No tin mas investigacion andando. El a pidi Hues pospone detencion di J.A.L.

FISCAL TA REACCIONA

Fiscal a bisa Hues cu anterior tabatin caso contra prolongacion di detencion di Papo caminda e presenta e puntonan cu e abogado a trece padilanti pero a wordo rechaza. Fiscal ta haya cu ta trata aki di un acusacion serio, esta cu durante 5 aña tabata bende droga. Fiscal a bisa Hues cu e ta haya cu no tin motibo nobo treci pa abogado pa suspende Papo su detencion. El a pidi Hues pa rechaza e peticion.

HUES A RECHAZA

Hues a dicidi cu ta rechaza e peticion di abogado. Hues a bisa cu e no ta haya cu a bin cu motibo nobo compara cu e caso anterior. Hues a bisa cu no tin suficiente indicacion cu J.A.L. no por keda deteni. Hues a pospone e caso pa dia 9 November 2018 pa 9’or di mainta.

 

- Advertisement -

DUNA COMENTARIO

Please enter your comment!
Please enter your name here