Home General Abuso na Aruba tin su temporada “low season” y “high season”

Abuso na Aruba tin su temporada “low season” y “high season”

142
0
SHARE
- Advertisement -

Trudy Hassel:  Polis ta atende casi 4 mil caso pa aña

ORANJESTAD  (AAN) — Recientemente, a tuma lugar un charla tocante Abuso di Mucha, na Theresita Center, na San Nicolas.

E dos oradornan invita tabata Trudy Hassel y Jeanine Rodriguez cu a elabora tocante con pa reconoce e señalnan di abuso.

Sra. Trudy Hassel a cuminza na palabra, y a expresa cu e ta hopi honra di a wordo invita pa participa den un proyecto sumamente importante cu ta regarda no solamente mucha, pero di tur e victimanan di abuso.

Sra. Hassel a señala cu ABUSO ta un palabra sumamente grandi, pasobra na Aruba no solamente mucha ta wordo abusa, sino hende di tur edad, hende homber y hende muher, hoben y personanan di edad avanza.

Pesey e no a concentra riba abuso di mucha sino en general, aunke den su charla por distingui cierto elementonan cu ta referi na abuso di mucha.

Sra. Hassel a trece dilanti na prome lugar cu e ta Comisario di KPA pero cu e no ta hefe di Recherche aworaki, sino cu e ta ocupando un funcion den Imigracion, y el a menciona esaki pasobra e ta hayando den e grupo di personanan cu ta bin di afo, casonan cu tambe tin di haber cu abuso.

E dama a subraya cu e situacion di abuso ta asina amplio na Aruba cu casi e ta birando un sorto di cultura.

Sra. Hassel a enfoca riba e preguntanan:  kico eigenlijk ta abuso? (en general); cuanto biaha polis ta confronta cu casonan di abuso pa aña? con por reconoce cu ta abuso? Con polis ta reacciona? Con un persona ta reacciona y kico e por haci?

 

KICO TA ABUSO?

Sra. Hassel a menciona cu tin yen di teoria riba e tema di abuso. P’e abuso ta e momento cu salud of bida di un persona ta wordo poni den peligro of ta wordo afecta no solamente door di uza forza fisico, pero tambe na un manera verbal, abuso emocional, psicologico, y abuso sexual.

E dama a indica cu mayoria di biaha e meta di e abusadornan ta hinca miedo, isola e victima pa force haci cosnan cu e no kier, naturalmente pa domine pero mayoria di biaha e ta manipula e victima.

Sra. Hassel a duna di conoce cu hopi biaha ora polis ta atende cu caso di abuso, nan ta puntra e victima di con e no ta entrega keho. Nan ta bay cu e abusador y nan ta wak con mucha chikito ta para na banda y ta presencia actonan di abuso sea contra nan mama of nan tata, y tin biaha e victima cu ta lanta para bisa “basta”! Y ta pidi polis pa bay cu e abusador.

Pero tambe nan ta confronta situacionnan unda cu e victima ta lanta contra polis ora nan ta bisa cu nan ta bay cu e agresor.

El a reitera cu e meta di e agresor ta eherce control riba e victima. Sra. Hassel a menciona cu recientemente un persona ayega na dje, a traha un video di dje pasobra e tabata victima pa añanan largo, di abuso domestico.

E ta un historia hopi tristo pero cu ta refleha kico e ta treciendo dilanti, sra. Hassel a señala. E abusador kier control poder riba su victima.

Tocante cuanto biaha polis ta wordo yama pa atende cu casonan di abuso, sra. Hassel a duna di conoce cu el a tuma contacto cu Central di Polis pa hacie e pregunta, y nan a bise cu tin “low season y high season” di abuso. Den temporada baho ta un periodo cu no tin fiesta continuo, na unda no tin actividad di carnaval, concierto ni otronan unda hopi uso di substancianan ta tuma lugar. Den e temporada aki polis por haya entre dos pa cinco yamada pa dia pa caso di abuso, cu por ta contra muher, homber, mucha, etc.

Den temporada halto: Pasco, Aña Nobo, Carnaval, fiesta, concierto, etc., polis ta haya entre cinco pa siete yamada pa dia pa atende cu abuso. Si calcula un average pa aña, por ehemplo pa e aña aki tin 54 caso di abuso di mucha registra. E cantidad di casonan den low season ta 1800 y den high season 2500 caso.

E dama a subraya cu tin hopi elemento pa por reconoce ora tin abuso fisico abuso fisico, por mira marcanan cora of blow, por wak cu muchanan ta distancia nan mes di un grupo, nan ta keda keto, vooral riba tereno di scol por wak esaki masha duidelijk, incluso den kleuterscol. Ta muchanan cu no kier participa den ningun actividad, nan no ta participa den evento cu tin e topico di abuso, nan ta aparta completamente of sinta den un skina, nan ta spijbel, no ta tuma parti mas den actividadnan social, etc. Nan ta cuminza cu actonan extremo manera cortamento di pols, cosnan cu ta causa dolor, of den partinan cu ta keda tapa, y tambe nan ta cuminza mutila nan mes.

Hopi biaha polis ta wordo yama pa muchanan cu ta bay for di cas, y tambe por mira mayornan cu ta saca aviso riba facebook pa e wordo yuda busca su yiu.

Hopi biaha no ta wordo puntra kico ta pasando, pero ta expresa cu e mucha ta mala mucha y gusta caya na lugar di puntra ki problema nan por ta pasando.

 

- Advertisement -

DUNA COMENTARIO

Please enter your comment!
Please enter your name here