Home Comentario Accidentenan di auto cu ta tumando lugar asina tras di otro tin...

Accidentenan di auto cu ta tumando lugar asina tras di otro tin hopi ciudadano preocupa

13
0
SHARE
- Advertisement -

ORANJESTAD (AAN) — E accidentenan di auto cu ta tumando lugar cu hopi frecuencia e ultimo simannan aki, y unda ya caba hasta a cobra bida di tres hoben, tin varios ciudadano den nos comunidad, sumamente preocupa.

Den e fin di siman tabata tin dos accidente cu, aparentemente, cu aunke no a causa morto, e dañonan material mes ta mustra con pisa esakinan tabata.

Hopi imprudencia ora di stuur  ta locual hopi ciudadano ta señando, esaki den dia cla, atardi, anochi, cual ora cu ta cu tin automobilista riba caminda.

E no dunamento di preferencia ta un situacion sumamente preocupante pero tambe e hecho cu hopi hende ta stuur mientras alavez ta papia of ta chat na celular.

Ta haci falta mas medida severo cu e tipo di manehadornan aki cu no ta tene nan mes na e leynan di trafico.

Pero tambe tin otro situacion basta serio. Esaki ta e hecho cu tanto hoben ta sali di lugarnan nocturno den oranan di madruga, bon bebi!

Nan ta un peligro pa nan mesun bida y pa otro cu no tin nada di haber cu esnan cu ta sali bayendo cas madruga, for di un lugar di diversion.

Tambe den madruga tin trahadornan yegando cas for di trabao. Of tin hende cu ta bayendo hospital cu un ser keri cu un problema di salud, por ehemplo. Of hende cu a bay keiro, of un fiesta manera un cumpleaño of un casamento, y ta bin laat cas pero cu no necesariamente ta bao influencia di alcohol. Nan tambe ta na peligro y por bira victima di esnan cu ta core bao influencia y na velocidad halto.

Berdaderamente tin ciudadanonan na Aruba hopi preocupa. Cada vez cu nan ta scucha sirena di polis of ambulance, ya nan curazon ta bati duro, y si nan tin un yiu cu no ta na cas pero nan sa cu por ta riba caminda, peor ainda!

Diferente persona ta puntra nan mes kico pa haci? Na unda e solucion ta? Nan ta sinti cu e problema ta bayendo for di man y cu ni autoridad por haci nada si den diferente caso, e mesun mayornan no por pone un stop na nan yiunan cu bebemento.

E problema no ta tanto den maneha auto laat den anochi pa madruga, e problema ta e influencia di alcohol cu no ta permiti hende razona, reacciona na tempo pa no perde control, y scapa nan mesun bida of di otro. Por ta incluso, cu bao influencia di alcohol den momento di peligro e persona su adrenalina ta aumenta y no pensa ni mes riba e consecuencianan di su acto.

Pues, esaki ta un problema social sumamente serio cu gobierno tambe lo mester tene cuenta cune, y cuminza alomenos cu un campaña di concientizacion. Asina leu e opinion compila durante e siman di varios ciudadano sumamente preocupa, y sigur cu tur razon!

- Advertisement -

DUNA COMENTARIO

Please enter your comment!
Please enter your name here