Home Hudicial Acusado ta cuestiona cu misteriosamente a perde parti di video cu ta...

Acusado ta cuestiona cu misteriosamente a perde parti di video cu ta mustra su inocencia

174
0
SHARE
- Advertisement -

PG a pidi Hof pa confirma castigo di 5 aña di prison

ORANJESTAD  (AAN) – E homber E.d C., condena na 5 aña di prison pa un atraco arma, a cuestiona na Hof cu con por ta posibel cu awor misteriosamente net e parti di e video cu ta mustra su inocencia a perde. E acusado ta para riba cu e no ta complice sino victima di e atraco arma y cu el a wordo forza pa yuda e atracador. Procurador General interino (PG) ta haya cu E.d C. ta culpable y a pidi Hof pa mantene e castigo di Corte den Promer Instancia, esta 5 aña di prison.

VIDEO A DISPARCE

Tratamento di e caso aki tabata posponi pa asina e tres Huesnan cu ta forma Hof, mira e video di seguridad pa determina si E.d C. ta complice of victima. Dialuna a sigui cu e parti caminda Hof tabata desea pa wak imagennan di video di seguridad. Hof a remarca cu a pidi pa imagennan pero un parti, esta e parti ora cu E.d C. ta sali for di oficina di transfer placa na Socotoro, no tey mas.

E.d C. a reclama, pakico net e parti cu ta mustra su inocencia no tey mas. Segun E.d C. el a wordo forza pa yuda den e atraco. PG a splica Hof cu despues di un tempo e imagennan ta perde for di e video. E acusacion contra E.d C. ta cu riba 16 Juni 2017, hunto cu un otro homber, a haci asalto un asalto arma na un oficina di transfer placa den Socotoro.

PG a remarca cu despues cu E.d C. a sali for di e lugar, el a bay paga pa hermentnan cu el a usa como deposito pa haya placa. El a puntra si esey ta placa cu el a haya di e atraco. E.d C. a bisa cu e placa ey no ta di e atraco. E.d C. a bisa Hof cu e ta sera den KIA por nada.  E.d C. a bolbe remarca cu ta straño cu imagennan a disparce pasobra Recherche a haya esakinan.

PG A PIDI PA MANTENE CASTIGO

PG a bisa Hues cu Corte den Promer Instancia dia 4 Januari 2018 a condena E.d C. na 5 aña di prison conforme na exigencia di Fiscal. PG a mustra cu E.d C. ta bisa cu el a wordo forza pa yuda ora e atracador a saca pistol. PG a bisa cu e no ta di acuerdo cu e pensamento aki. El a bisa cu e ta comparti punto di bista di Hues cu ta E.d C. ta complice di e atraco arma. E dama trahandor a bisa cu tur dos atracador tabata arma y a bay cu 7500 florin. Un di nan a hib’e den un cuarto y e otro a bay coy e placanan. Na opinion di PG, for di e imagennan di e video di seguridad por mira esaki bon cla. Segun PG for di e imagennan no por mira ningun momento cu e atracador V. lo a menaza of forza E.d C.

PG a sigui bisa cu otro punto ta, cu despues di e atraco, E.d C. a bay paga na Estrella pa e hermentnan cu el a deposita pa haya placa. Na opinion di PG, e ponencia di E.d C. cu el a wordo forza pa yuda den e atraco arma, no por saca esaki for declaracion di e dama y tampoco e contacto cu E.d C. tabatin cu e homber V. PG a bisa cu ta E.d C. hunto cu V. a haci e atraco arma.

El a splica Hof cu despues a detene V. kende a bisa cu e tabatin contacto via cellular cu E.d C. pa un trabou como mecanico.

Pa cu e castigo, PG a bisa Hof cu e caso aki ta hopi serio y a afecta e dama. PG ta haya e castigo ta na su lugar. El a bisa cu den pasado caba a condena E.d C. na 4 aña di prison pa algo parecido. PG a mustra cu E.d C. ta bisa cu e condena anterior no tabata su culpa tampoco. PG a pidi Hof pa confirma e castigo di 5 aña di prison.

ABOGADO

Abogado mr. v.d.Biezen a bisa Hof cu E.d C. ta mustra cu el a wordo forza pa haci e atraco arma. E acusado a bisa cu e homber V. a bisa na Spaño pa coopera y cu e ta arma. Awor ta resulta cu e parti caminda ta mira E.d C. ta sali for di e lugar hunto cu V., no tey mas.

Na opinion di mr. v.d.Biezen, tin dos scenario esta cu e acusado a wordo forza y cu e acusado ta complice. E abogado a bisa Hof cu e hecho cu no tin imagen mas, no por perhudica e acusado pasobra no ta su culpa cu esakinan no tey mas. E abogado ta haya cu aki mester duna e acusado e beneficio di duda. E abogado a conclui cu mester laga e acusado liber.

Hof a bisa cu ta bay studia e caso y dia 10 September 2018 lo por spera sentencia.

 

- Advertisement -

DUNA COMENTARIO

Please enter your comment!
Please enter your name here