Air Ambulance a transporta e mucha turista bek pa Puerto Rico

    492
    0
    SHARE
    - Advertisement -

    ORANJESTAD(AAN): Loke a pasa den siman cu e accident grave riba caminda di Palm Beach pa Malmok, ta mustra un biaha mas riba e importancia cu semper bo tin di tuma un “Travel Insurance” ora di haci viahe den exterior.  Pa casonan di emergencia, un Aseguro di Viahe por yuda hopi.

    DIARIO tin indicacion, cu na Aruba bon mes e pasaheronan ta costumbra na cumpra Aseguro di Viahe.  Hopi hende ta hacie cerca companianan local, pero awor tin hasta companianan riba Internet cu ta bende esaki.  Varios Arubiano ta costumbra di cumpra Online Travel Insurance tambe.

    E famia turista di Puerto Rico cu a haya nan envolvi den accident riba Diaranzon pasa, no tabatin travel insurance.  Y esaki a bira un tiki problematico pa nan por a regresa nan pais cu nan yiu herida.

    Despues di a haci varios intento pa haya un manera pa transporta e hobencita Yednielyz Perez Rivas, di 7 aña pa su pais natal Puerto Rico, finalmente a bin logra haya un Air Ambulance di e compania Dominicano “Air Med” bin Aruba pa asina trece e mucha cas.

    Air Med a manda un jet tipo Citation 510 di Republica Dominicana cu matricula HI949 y a baha na General Aviation.  E team medico cu a yega, a worde transporta cu ambulance pa hospital, pa asina prepara e mucha pa e biahe, cu tin un duracion di 1 ora.

    Unavez na Puerto Rico, tabatin un otro ekipo medico y un Ambulans di Cuido Intensivo ward’e na e aeropuerto internacional.  Su yegada na Puerto Rico a wordo hasta transmiti en vivo pa WAPA-TV.  Mas di esaki den un otro noticia.

    Pero prome cu tur esaki a socede, mester a warda pa por a logra haya pago pa asina cubri e gasto di Air Ambulance.  Famianan di e mucha a menciona cu nan a haya sa, cu e lo costa entre $30.000 pa $32.000 pa esaki.  Pero nan mes no tin Travel Insurance.

    E ora nan a cuminza haci suplica na nan gobernantenan na Puerto Rico, na demas famia, y hasta haci yamada na pueblo pa haci donacion na un cuenta bancario na e pais.

    E canal WAPA-TV tabata uno cu a cuminza cubri e noticia aki, y tabata duna number di e cuenta di banco pa publico haci donacion. Tambe nan a pidi ayudo na gobierno estatal di Puerto Rico.

    Den media na Aruba, a circula informacion cu na principio kier a manda e mucha muher rumbo Colombia pa cuido pediatra specializa, como cu e isla aki tin cierto acuerdonan cu e pais aki.  Pero e famianan tabata prefera hiba nan yiu bek pa Puerto Rico.

    Asina e famia a cuminsa pidi yudanza, y bon mes nan a haya esey.  E empuhe di mas grandi a bin di un turista, esta un Oficial Retira di Polis di New York, kende tambe tabata cu vakantie, a bin duna sosten.  Ex-oficial Sean Whelan a pone su Credit Card disponible como garantia, y alavez a haci donacion di $15.000 pa cubri gastonan di transporte.  Aunke segun e secretario di salud, Rafael Rodriquez, e placa ey a djis cubri costonan di Jet Fuel y nada mas.

    Mientras tanto e ta na Puerto Rico y specialistanan lo sigui atende.

    - Advertisement -

    DUNA COMENTARIO

    Please enter your comment!
    Please enter your name here