Home General Angelo Tromp a splica: Resultado di un simbiosis: GAST tin un...

Angelo Tromp a splica: Resultado di un simbiosis: GAST tin un espacio na ANA y ANA un tremendo exposicion

75
0
SHARE
- Advertisement -

ORANJESTAD (AAN) — “Proposal” manera e palabra ta indica, ta un proposicion y esaki ta e nomber di e exposicion di Arte Contemporaneo, cu a tuma lugar diabierna ultimo anochi, na Archivo Historico Aruba, y netamente e intencion ta pa yega na un proposicion pa yega na un museo di arte contemporaneo permanente.

Sr. Angelo Tromp, den un conferencia di prensa previo e mesun diabierna mainta, a duna di conoce cu actualmente, cu colaboracion di Archivo Nacional, ta bay tin disponible e sala di exposicion di ANA pa “Proposal”, cu lo keda habri pa un temporada largo, pa e publico en general, cu intencion tambe den e transcurso di e lunanan cu ta sigui di invita scolnan.

Angelo Tromp a sigui splica cu e proyecto aki ta un iniciativa di Fundacion GAST, cu den su maneho un coleccion di arte. El a reitera cu e exposicion aki ta pa haya un idea pa yega na un expo permanente, na unda pueblo di Aruba y nos bishitantenan, un miyon di stay over, segun e por a compronde cu ta e cifra anual y cu tambe ta bishita museonan, ta un grupo basta grandi cu GAST mester entusiasma pa bin wak e talento cu Aruba tin.

E exposicion mes ta consisti di alrededor di cien obra, di tanto artista local como internacional. Tin talentonan hoben, nobo, cu a gradua recientemente na Rietveld Academie na Hulanda, entre otro Natusha Croes, Chelssea Croes, Darwin Winklaar, Osaira Muyale.

Angelo Tromp a splica cu e obranan aki a wordo cumpra den añanan 90, tempo cu na Aruba tabata tin un movimento basta positivo riba tereno di arte moderno.

Tromp a agrega, cu e tempo ey tabata tin Galeria Eterno den Emanstraat, y esaki a eherce un influencia hopi positivo riba arte na Aruba.

Desde e tempo ey tabata tin un coleccionista priva Hulandes, cu a cuminza cumpra arte tanto local como internacional, y na 2011 a drenta den combersacion pa wak con por a haya un parti di e coleccion ey, na Aruba.

Tromp a sigui bisa cu mientras tanto e obranan tey y e idea ta pa entusiasma mas hende den arte contemporaneo, pero tambe artistanan cu tin obranan na cas, cu eventualmente lo kier pone nan na disposicion pa pueblo henter wak’e.’ Tambe tin ayudo di Het Prins Bernhard Cultuur Fonds y UNOCA cu tambe tin su propio coleccion y tambe tin combersacion pa wak si por haci e coleccion, tanto local como internacional, mas amplio.

Angelo Tromp a reitera cu aworaki e obranan ta na ANA, cu tin un sala grandi di exposicion cu na e momentonan aki tabata bashi y door di e simbiosis aki tur dos partido a gana: GAST tin un espacio y ANA un exposicion.

E espacio ta temporal pero e mester yega na un exposicion permanente y nan ta den combersacion cu mas partido caba, tanto fondonan cultural, como sector gubernamental y priva, pa wak con asina por yega na un forma estructural y beneficioso pa Aruba henter.

Finalmente sr. Angelo Tromp a expresa cu den ciudadnan manera Bilbao y Amsterdam unda cu tin un concentracion basta fuerte di museonan, e ta contribui na e desaroyo economico, unda un grupo grandi di turista ta bin bishita nan netamente e museonan.

Aki na Aruba cu ta bin hopi turista y cu tin e interes di e artistanan local, lo por yega na un acogida mas grandi cu lo por contribui na nos producto turistico.

El a agrega cu e disciplina ta varia bastante, y ta consisti di fotografia, film, performance, y escultura. Durante e lunanan venidero lo invita scolnan pa bin bishita e expo aki, no solamente alumnonan di CKV pero henter scol, pasobra sigur arte y cultura por yuda den e desaroyo general di un pueblo.

E expo lo keda habri durante oranan laboral, y ta den palabracion pa wak si lo por habri den fin di siman, pa esnan cu no por bin den siman.

 

 

- Advertisement -

DUNA COMENTARIO

Please enter your comment!
Please enter your name here