Home Comentario Argentina den buskeda mercado turistico Latino Americano

Argentina den buskeda mercado turistico Latino Americano

18
0
SHARE
- Advertisement -

Inflacion halto, pobresa i caida economico enfrente espectativa

*ATA cu e tarea pa reemplasa turistanan Venezolano

*Hotel y Restaurant sector solido pa economia

ORANJESTAD (AAN)E cifranan registra den “The State of the Economy” pa e prome tres lunanan di 2018, a crea speransa grandi cu Argentina por bay yuda reemplasa Venezuela como mercado turistico. E publicacion di Banco Central di Aruba emiti dia 10 di Augustus 2018, ta señala Argentina como e mercado Latino Americano mas prominente. Un delegacion di ATA a hiba e bon noticia pa e mercado prometedor pero mientrastanto e situacion economico di Argentina a cambia.

E situacion na Venezuela tin resultado importante pa Aruba riba tur tereno. Proyeccion haci pa Aruba no a conoce cambio unicamente pa loke ta trata e proyecto refineria. Turismo a keda e entrada principal di turismo na 2018. Produccion di e mercado Venezolano a sufri un caida enorme.

ATA y e sorpresa Argentino

“State of the Economy” ta e publicacion di Banco Central di Aruba, cu ta duna un resumen di e desaroyonan economico di e pais di cada trimester. Durante e prome tres lunanan di 2018 Argentina a sorprende cu un crecemento di 11.2 porciento. El a brinda un perspectiva pa Aruba, cu a mira e mercado Canades ocupa e di dos luga despues di Merca.

Un delegacion di ATA a biaha pa Argentina pa presenta e bon noticia y un pakete special. Dia 15 di Augustus 2018 Travel 2 Latam a presenta un relato di e encuentro entre ATA y un grupo selecta di periodista. A ofrece e beachnan di Aruba y un Honeymoon Package invitando damanan pa tuma e iniciativa pa bini Aruba despues di nan enlace matrimonial.

E articulo a aplaudi cu no obstante e situacion debil di e mercado, turismo di Argentina pa Aruba a crece.

Futuro cercano lo mester demostra si Argentina por produci suficiente turista pa yuda reemplasa e mercado Venezolano, cu a baha cu mas cu 60 porciento compara cu 2017 y crea un impacto enorme riba cifranan total pa turismo den e prome semester di 2018.

Caida economico Argentina 

E imagen cu e Presidente Argentino a presenta na mundo siman pasa, no ta uno cu ta crea hopi speransa. Mauricio Macri a papia di un pais cu ta registra pobresa creciente. E pais mester a pidi Fondo Monetario Internacional un linea di credito di 50 Biyon Dollar.

Peso Argentino a cay como resultado di e desaroyonan monetario na Turkia. Esey a produci un inflacion di 31.2 porciento pa e aña cu a caba na juli 2018.

E cifra di pobresa cu a baha na 2016, a subi y ta spera cu 2018 lo cera cu aumento di 2 pa 3 porciento pa loke ta trata pobresa. Economia di e pais lo cay na 2018 pero lo subi poco na 2019 segun economistanan. E tendencia aki lo afecta e resultadonan turistico debi na e caida di entrada general. Semper lo keda e grupo cu por gasta sin depende di situacion social di e pais.

Informacion ta indica cu Aruba por sigui cu promocion na ciudadnan Argentino pero den e situacion internacional actual mester intensifica promocion na Merca y sigur na Canada, cu tambe a crece den e prome trimester cu 11.2 porciento.

E actual esfuerso di ATA pa crecemento di e mercadonan Colombiano y di Brazil, ta continua. Ta trata di mercadonan tambe prometedor.

Hotel y restaurant Aruba ta solido

Sector turistico di Aruba a señala un crecemento durante e prome tres lunanan di 2018 contrario na e totalidad di region Caribense cu a conoce un caida di e producto turistico na inicio di 2018.

Banco Central a emiti e Business Perception Control pa e segundo trimester (Mei te cu Juni) 2018. E cifranan ta mantene e pensamento cu industria turistico ta solido.

Segun e cifranan di investigacion di e condicion economico actual, hotel y restaurantnan ta alcansa un aumento di 110 porciento den e tres lunanan di e segundo trimester.

E gran mayoria di participantenan na e chekeo, no ta mira cambio economico na e momentonan aki ni den futuro cercano pa Aruba.

E refleho di e situacion economico actual den mundo hotelero y di restaurant ta visibel tambe den e reaccionnan pa loke ta trata aumento di gasto di personal, inversion y benta durante April, Mei, Juni 2018.

Instancianan turistico lo mester vigila e posibilidad cu Argentina ta brinda como mercado turistico y resultado di e promocion special di ATA cu cooperacion di otro instancia Arubano.

- Advertisement -

DUNA COMENTARIO

Please enter your comment!
Please enter your name here