Home General “Aruba Lion Fish Initiative Foundation” buscando boluntario pa yuda reduci invasion di...

“Aruba Lion Fish Initiative Foundation” buscando boluntario pa yuda reduci invasion di Lion Fish

54
0
SHARE
- Advertisement -

Rif di Aruba ta pesta cu Lion Fish

ORANJESTAD (AAN): Ta conoci cu na Aruba tin un problema grandi cu e invasion di Lion Fish den nos costanan. Ta purba di mantene e poblacion di e pisca aki minimo pa asina no daña e eco-sistema y nos medio ambiente.

Den entrevista cu Luciano Mazzeo di Aruba Lion Fish Initiative Foundation, el a duna di conoce cu e fundacion aki a lanta na 2017 y actualmente tin un cantidad di 50 buzo boluntario cu casi tur dia ta drenta lama rond di Aruba pa busca Lion Fish.

El a laga sa cu Aruba ta sufriendo un problema hopi serio y pa e motibo aki tres boluntario a tuma e decision di lanta e fundacion aki y asina purba di sali tur dia, busca mas boluntario y fortalece e programa.

Mazzeo a indica cu nan a cuminza traha riba un plan pa loke ta e problematica di Lion Fish. E fundacion tin un total di 9  “Board Members” y 50 buzo, entre hendenan local y di afo.

INVASION DI LION FISH

E meta di e fundacion ta pa saca e pisca for di lama ya cu lama ta pesta di Lion Fish.  Pa haci un miho trabao, kier busca “underwater scooters” y un drone pa bay bao awa. E idea ta pa haci un mapeo di e rif.

E lion fish cu ta yega Aruba ta bin di panoord. El a aparece na 2009. Ta procedente di Asia y a wordo introduci na Florida na 1985, ora cu un doño di un acuario a wak cu su pisca a crece hopi y a bente den lama. Un estudio genetico haci a determina cu e infeccion cu tin den henter e region tin di haber a cuminza cu 9 female.

E infeccion a cuminza na 1985 y a expande na e Golfo di Mexico y awor a yega te na Brazil, Mazzeo a señala.

REDUCI E POBLACION

E obhetivo ta pa reduci e poblacion di lion fish te na un maximo posible pa duna e rif un chens di sobrebibi. Nan ta reproduci hopi lihe. E “female lion fish” ta pone cada tres dia 30 mil of 40 mil webo. Kiermen 2 miyon webo pa aña pa un solo pisca hembra.  Mester agrega tambe cu un lion fish ta come 5 mil pisca local pa aña, locual ta nifica un problema basta serio.

INCENTIVO PA PISCADONAN Y DIVERS

Luciano Mazzeo a subraya cu e ayudo di e divers ta hopi importante. Ora cu ta train mas y mas persona pa bay gara e piscanan. Tin biaha ta haya ayudo di e piscadornan. Aunke e lion fish no ta bay pa liña, tog a cuminza usa usa otro hermentnan pa gara nan. Asina e piscadornan a cuminza bira consciente cu entre menos lion fish mas pisca tin pa nan.

Ta purba di encurasha mas y mas hende pa yuda den e buskeda di lion fish aki na Aruba. E lion fish, segun Mazzeo, ta come practicamente tur e otro piscanan. Nan ta matando e poblacion di piscanan y nan ta sobrebibiendo, pero na otro banda ta perhudicando e eco-sistema.

Un aspecto importante cu Mazzeo a señala cu tin biaha ta yega di wak muchanan sin trabao of sinta banda di lama sin haci algo productivo. Pakico no motiva e hobennan of otro personanan pa siña dive y asina bay yuda gara e lion fish na Aruba?

Esaki, a bisa, lo por bira te hasta un fuente di entrada pa nan. E hobennan aki si ta wordo getrain debidamente lo por gara e lion fishnan y bende nan na e restaurantnan. Tin varios restaurant cu ta trahando platonan varia cu lion fish y ta masha dushi mes.

A cuminza crea un sorto di gastronomia rond di e lion fish, cual no ta un pisca peligroso pa come ora di kita su partinan cu tin veneno.

Cu e iniciativanan aki ta yudando na reduci e poblacion di e lion fish y banda di esey a crea tambe un manera pa e piscadonan y e buzonan boluntario haya un entrada.

Segun Mazzeo, e fundacion den e casonan aki ta haci donacion di e lion fish na e restaurantnan cu di nan parti ta duna un ayudo monetario pa asina e fundacion por sigui haci su trabao. Di e mesun manera mas y mas personanan lo por beneficia y na mesun momento lo yuda elimina un plaga.

- Advertisement -

DUNA COMENTARIO

Please enter your comment!
Please enter your name here