Home Politica Aruba por bira centro di “free for all” di PDVSA

Aruba por bira centro di “free for all” di PDVSA

46
0
SHARE
- Advertisement -

Investigacion internacional di DIARIO ta revela

* Rusia tin 49.9 porciento di Citgo como colateral

* Venezuela ta bay perde refineria strategico na Curaçao

ORANJESTAD  (AAN):  Na juni 2016 Aruba a firma acuerdonan pa na e segundo parti di 2018 e refineria Arubano renoba lo por a bira operacional. E anuncio di e plan a bira controversial. Un parti di e pais a uni den celebracion grandi y otro parti a lansa reserva y critica. E nacemento di e compania Arubano Citgo Aruba Refining (CAR) y e hecho cu e refineria di Aruba lo a keda propiedad di e pais a contraresta e temornan enfrente riesgonan di e acuerdonan. Sinembargo tabata tin factornan internacional mucho mas importante cu no a discuti.

Awe dos aña despues di e acuerdo y na e momento cu e planta mester a bira operacional, Gobierno di Aruba a pidi Citgo splica kico por spera. DIARIO a aumenta su vigilancia di e desaroyonan internacional relaciona cu PDVSA. Durante e ultimo siman e esfuerso a culmina cu informacion cu e refineria na Aruba ta parti di loke den mundo comercial internacional ta ser yama “free for all” di Venezuela. 

Chavez, Maduro, Rusia y Citgo

Tabata na 1986 cu e compania estatal Venezolano, Petroleos de Venezuela S.A. a dicidi di cumpra 50 porciento di e accionnan di e compania Mericano Citgo. Na 1990 a cumpra e resto di accionnan loke a haci Venezuela doño di e empresa cu no tabata bay bon.

Na 2010 Presidente Hugo Chavez di Venezuela a dicidi di bende e compania pa 10 biyon Dollar pero no a logra debi na e prijs. A tuma otro medidanan financiero interno.

A base di e problemanan financiero cu a surgi na Venezuela,  Maduro kier a bende 40 porciento di e accionnan di Citgo cu Rusia pero no a realisa e plan.

Maduro a dicidi di pone 49.9 porciento, pues casi mita,  di e accionnan di Citgo como colateral (borg) pa e debe cu Venezuela tin cu Rusia. Te awor e compania di estado Ruso, Rosneft, a duna di conoce cu e no ta haci uzo di e posibilidad pa haci casi mita di Citgo su propiedad.

Na november 2017 primo di Hugo Chavez, Asdrubal Chavez a bira Presidente di Citgo mientras e ehecutivonan anterior a ser cualifica como corupto.  Dos luna pasa, Merca a kita su Visa pa drenta Merca y e mester dirigi Citgo for di exterior.

Merca na careda cu Citgo

Ora Aruba a dicidi di yega na un acuerdo cu Citgo, a funda un compania Arubano cu ta resorta bao ley di Aruba. Sinembargo, e compania Citgo Aruba Refining ta un subsidiario di PDVSA y ta parti di e problema mundial.

Na momento di firmamento di e acuerdonan den presencia di Presidente Nicolas Maduro, Aruba a celebra y Aruba a expresa temor.

E reaccion oficial di Gobierno tabata cu no mester ta pesimista y cu CAR ta un compania local cu mester cumpli cu loke el a firma. Tambe a declara cu e refineria mes lo a keda propiedad di Aruba cu a logra un convenio cu Valero cu lo no a keda responsabel pa problemanan ambiental ni desmantelacion di e refineria.

CAR mester a cumpli cu e contracto cu Aruba y leynan local. Sinembargo, no ta e parti financiero so ta e riesgo. E menasa serio ta e realidad Venezolano.

Merca ta un di e paisnan cu for di 2016 ta na careda den loke prensa internacional y companianan petrolero cu PDVSA debe placa ta yama “free for all” di PDVSA.

Na Februari 2017, mientras Aruba ta desaroya plannan grandi, informacion di entre otro Reuters y Financial Times ta mustra cu companianan Mericano ta dicidi pa tuma pasonan legal pa transforma debe Venezolano den nan participacion den Citgo.

Doñonan di bononan di alrededor di 3 Biyon Dollar cu lo a caduca na 2020, a acerca abogadonan pa mira con nan por cambia e bononan den accionnan den Citgo pa asina crea un balansa cu Rusia. Crystallex, un compania minero di Canada a base di decision arbitrario di World Bank tampoco tabata di acuerdo. Siman pasa el a haya permiso di Hues pa confisca propiedad di Citgo. Venezuela a apela e sentencia di Hues. 

PDVSA ta perde Curaçao

E momento cu PDVSA ta perde su refineria strategico na Curaçao, ta yega mas cerca. Economia di e isla a bira victima di e problemanan di PDVSA, cu den Aruba lo por bay trata di haya un centro nobo pa medio di Citgo.

Mientras e situacion mundial di PDVSA ta empeora, Curaçao a dicidi di busca un partner strategico cu lo bira den realidad un compania cu ta reemplasa PDVSA na e refineria.

Na e momentonan aki PDVSA no ta uza tankinan na Curaçao y Bonaire pa warda petroleo debi na e riesgo cu companianan cu e debe placa lo confisca e petroleo.

E riesgonan menciona na momento cu Citgo a yega na un acuerdo cu Aruba tabata mucho mas serio cu a ser presenta na pueblo.

Siman pasa Gobierno di Aruba a pidi Citgo bin splica kico lo pasa. Citgo Aruba a duna di conoce cu na September lo cuminsa cu e segundo fase y cu lo inverti 39 Miyon Dollar cu lo bin di Venezuela, pais den problema financiero grandi.

Tin otro partinan mucho mas importante manera ta sali dilanti den e investigacionnan.  E regimen Maduro ta uza Citgo como baluarte den mundo liber.

Na Juni 2018 ya a introduci cambio den e gerencia na Aruba.

PDVSA ta fortifica su propiedadnan cu presencia di personanan cu Gobierno di Nicolas Maduro ta confia pero tambe ta confiabel pa Rusia, cu tin 49.9 porciento di Citgo den su man.

Un panorama nobo di Citgo ta presenta su mes. DIARIO ta keda pendiente pa por informa cu lectornan.

Interesante ta keda e reserva internacional for di principio di e proyecto Citgo na Aruba.  “Citgo Petroleum kier uza 685 Miyon Dollar pa renoba e refineria di Aruba y a pida PDVSA cu ta den problema cu placa pa duna 100 Miyon Dollar inicial.” Un informacion di Reuters, cu ta confirma e situacion confuso actual.

 

 

 

- Advertisement -

DUNA COMENTARIO

Please enter your comment!
Please enter your name here