Home Politica Aruba por busca otro compania pa refineria

Aruba por busca otro compania pa refineria

180
0
SHARE
- Advertisement -

Expertonan financiero internacional mester duna guia

Aruba den crisis no por carga riesgo di Citgo

ORANJESTAD  (AAN) — Si reparti e proyecto di Citgo den diferente fase, ta conclui cu Citgo no a cumpli cu e fase mas facil den e acuerdo. Aruba no a prepara su mes bon pa atende cu Citgo y no a scucha advertencianan realistico.

Awor Aruba mester uza expertonan financiero internacional pa hunto cu expertonan local analisa kico ta miho pa e pais, cu ya ta den crisis financiero severo.

Informacion cu DIARIO a ricibi ta mustra cu Aruba por nenga di sigui cu Citgo cu no ta brinda e siguridad di cumplimento di e proyecto sumamente ambicioso.

Na 2015,  Aruba tabata consciente cu e tabata den un situacion hopi dificil. Turismo tabata e pilar economico cu tabata depende di e mercadonan Mericano y Venezolano. Cu e entradanan di turismo Venezolano por a baha tabata un factor cu mester a tene na cuenta.

Tabatin proyectonan turistico grandi cu no a bira realidad. Den e situacion cu tabata demanda cautela financiero, na final di October 2015, Gobierno di Aruba a informa Parlamento di e proyecto pa haci e refineria operacional.

Hopi ambicion y poco siguridad

Aruba a conoce Citgo como un compania Mericano, cu a presenta un proyecto cu un inversion di entre 600 y 800 Miyon Dollar. E refineria lo a uza gas, cu lo a alcansa Aruba pa medio di pipa for di Venezuela. Un gran futuro tabata spera Aruba segun Gobierno, cu na Juni 2016 a firma un acuerdo cu Citgo.

Cifranan di instancianan oficial manera Banco Central, ta papia den proyeccion economico di Aruba cu palabranan di cautela. “Si e proyecto bira realidad” ta un pronostico banda di “Si e proyecto no bira realidad”.  Tabata tin un tercer opcion. “Si e proyecto no bira realidad y turismo cay”.

Na 2016 PDVSA, compania estatal di Venezuela, ta tur dia den noticia pa  problemanan grandi cu e ta enfrenta. Expertonan internacional ta adverti pa e caida di economia Venezolano, cu tabata titular di publicacionnan financiero y economico.  Paisnan grandi tabata teme resultado di desaroyonan di PDVSA.

Cu gran velocidad e pasa e proyecto den Parlamento despues cu Gobierno a firma e acuerdonan cu Citgo. Advertencia serio a bin di entre otro Hulanda.

Hulanda no ta responsabel 

Prome cu a firma e acuerdo, Hulanda a mustra cu e no ta responsabel pa e decisionnan cu gobernacion di Aruba a tuma pa e pais.

Miembronan di Parlamento Hulandes a expresa nan duda serio den e proyecto. “E ta haci mi nervioso,” un Miembro di Parlamento Hulandes a duna di conoce y a haci un apelacion na Gobierno Hulandes pa vigila kico Aruba ta acorda den e documentonan di 2Mil pagina.

Tanto na Hulanda como riba plataforma internacional tabata tin hopi reserva pa e plannan cu Citgo kier a realisa den un tempo cu economia di e compania madre di Citgo, PDVSA tabata sufri un caida total hunto cu e doño di e compania, Venezuela.

Politiconan Hulandes a cuestiona e conexion di gas entre Venezuela y Aruba y otro plannan futuristico cu e pais hunto cu PDVSA, cu no por a paga ni su debenan, lo a realisa.

Informacion ta mustra cu awor Aruba no por bay bati na porta di Hulanda. Tin Miembro di Parlamento Hulandes cu a pone e proyecto den luz di mal gobernacion. Politiconan Hulandes a haya siguransa cu placa di pueblo Hulandes lo no ser uza den caso di problema cu e proyecto cu gran riesgo.

PDVSA no por cumpli 

Tur indicacion ta cu PDVSA no por cumpli cu e acuerdo. E placa cu e compania estatal Venezolano mester hinca den Citgo ta nada compara cu e debenan enorme cu PDVSA tin rond mundo.

Aruba por dicidi cu e ta busca otro opcion pa su refineria. No ta Aruba a kibra e contracto pero Citgo cu no a honra loke el a palabra cu Aruba.

Informantenan a indica cu e prome parti di e contracto cu Citgo no por a honra te na e momento aki, ta esun menos costoso.

E resto di e contracto surpasa tur ambicion cu Citgo por tin na e momentonan aki. Citgo no sa kico ta spera Citgo mes.

Companianan cu PDVSA a habri den pasado, actualmente ta den problema y no por traha pronostico kico ta bay sosode.

Segun informacion na e momentonan aki Aruba mester dicidi pa siguridad y mester exigi Citgo duna un planificacion pa henter e proyecto. Na momento cu e bisa cu e no por,  Aruba mester habri caminda pa solucionnan nobo. Expertonan internacional riba tereno financiero mester guia Aruba pa evita problema serio pa e pais cu ya ta den crisis.

- Advertisement -

DUNA COMENTARIO

Please enter your comment!
Please enter your name here