Home Parlamento Aruba tin profesionalnan cu ta responsabel pa drecha nos pais

Aruba tin profesionalnan cu ta responsabel pa drecha nos pais

47
0
SHARE
- Advertisement -

Parlamentario Rocco Tjon, lider fraccion MEP:

ORANJESTAD (AAN) – Diahuebs, pa prome biaha den historia di nos pais, Gobierno, bao liderazgo di Sra. Mr. E. Wever-Croes, a bin duna un update con presupuesto 2018 ta wordo ehecuta.

Esaki a base di un mocion cu a wordo aproba door di MEP, POR y RED. Lamentablemente, fraccion di AVP a vota contra e mocion aki e tempo ey.

Lider di fraccion di MEP, sr. Rocco Tjon a splica cu e ta para awe den Parlamento cu sentimento mixto. E motibo di esaki ta cu di un banda instancianan imparcial, a base di cifranan honesto, ta prueba cu e maneho ta honesto y responsable. Pero apesar di esaki por deduci tambe cu CAFT, es decir Hulanda, kier impone mas norma riba pais Aruba.

CAFT

Den e rapport di CAFT por deduci cu nan kier impone con cierto procedurenan na Aruba mester cana. Nan kier exigi, por ehemplo, pa introduci un norma riba nos maneho di personal. Tambe den e rapportnan por saca afo cu nan kier pa tur fondo adicional (meevallers) wordo aloca pa cubri debe. Manera ta conoci e protocol 2015, firma y aproba door di AVP, a mina nos autonomia y tabata e base pa e ley di LAFT. Full e proceder tabata contra nos estado di derecho y nos constitucion.

Futuro di pais Aruba

Sr. Tjon a splica cu, como Arubiano, e ta convenci cu riba tur nivel, Gobierno, Parlamento y Departamentonan Gubernamental, tin e profesionalnan y e responsabilidad pa fiha e rumbo nobo pa nos pais. sr. Tjon a bisa: “ Nos mes por y ta responsable suficiente pa drecha nos pais. Mescos cu Hulanda ta bisa nos cu Aruba mester gana e confianza bek, mi ta puntra Hulanda ki confianza ami como Arubiano por tin den nan”.

Pa termina sr. Tjon a bisa cu si Hulanda ta haya cu si un Arubiano ta kere den su pais y su hendenan, esey kiermen mesora cu e ta contra Hulanda, laga nan defini esey asina e ora. Kere den Aruba y nos hendenan, no kiermen cu nos ta contra Hulanda.

Ki bal cu nos maneho ta wordo hiba corectamente y nos ta drechando e rumbo di nos pais, pero Hulanda kier mina nos autonomia. Awo nan kier dicidi riba maneho di nos personal y con mester aloca nos fondonan. Mañan nan lo kier dicidi ki color di uniform nos por bisti y con y den kico nos por inverti?

E desaroyo aki ta preocupante y sr. Tjon a duna di conoce cu, contrario na Parlamento 9, cu un mayoría absoluto di AVP, fraccion di MEP no lo aproba ni un ley cu ta mina nos autonomia y cu ta bay contra nos estado di derecho!

 

- Advertisement -

DUNA COMENTARIO

Please enter your comment!
Please enter your name here