ORANJESTAD (AAN): Diaranzon mainta, e presidente di e comision fiho di Deporte y Cultura den Parlamento, esta Endy Croes di fraccion di MEP, a presenta na prensa un buki cu el a ricibi durante un evento di Comite Olimpico Arubano (COA).
E buki ta skirbi pa Jossy Tromp, kende a wordo encarga pa skirbi un buki conmemorativo di 46 atleta cu a representa Aruba na Olimpiadanan di 1952 te cy 2016.
E buki ta inclui varios potret di atletanan manera entre otro Fiderd Vis, Calvin Maduro, Nicole Hoevertsz, Hubert Wester, Evelyn Farrel, Juni Faro y hopi mas.
E buki ta papia di e logronan di e atletanan na e diferente Olimpiadanan y e atletanan mes ta papia di nan experiencianan y nan historia den nan deporte.
Croes a duna un pabien na tur e atletanan y sigur na tur esnan cu a yuda hinca e bunita buki aki den otro, cu yama Nos Orguyo-46 Atleta Olimpico Arubano.
