Atake racista riba Hoben di 15 aña na Belgica tin tata Arubiano

    3271
    0
    SHARE
    - Advertisement -

    ORANJESTAD (AAN): Cu na Belgica tin algun hende ignorante ta biba, a keda comproba e siman aki, ora cu un video a cuminza circula riba Social Media con tres hende a ataca Diadomingo pasa un hoben di apenas 15 aña di edad na un Stacion di Trein.

    E ta demostra cu ainda no tin hende cu ta aprecia diversidad.

    E video a wordo mira mas di 1.000.000 biaha caba, y a wordo comparti na Aruba tambe.

    Loke hopi hende cu a share e video no tabata sa, ta cu e hoben Leroy Abraham di 15 aña di edad, su tata ta procedente di Aruba, y su mama ta di Republica Dominicana.

    Tur cos a cuminza ora cu e hoben Leroy tabata na Stacion di Trein na Aarschot hunto cu su ruman muher Julie  di 33 aña, y un ruman homber chikito di 9 aña.  Un baby di 2 aña di e ruman muher tambe tabata cu nan.  Nan tabata sperando riba e Trein cu ta hiba nan pa Brussels.

    Nan ta bibando cinco aña caba na Aarschot.  E sa bishita su ruman muher cu ta biba na Londres.  Segun Leroy, semper el a sinti su mes mas ‘safe’ na Inglatera compara cu na Belgica.

    ATAKE RACISTA:

    Wardando riba e Trein, diripiente Leroy a hisa man y saluda un amiga di dje cu el a mira para un tiki mas leu.

    Diripiente un homber (identifica como Jonas V. di 35 aña) a cana bin riba dje.  El a pusha e hoben Leroy y a puntre, ki ora e Trein lo yega.

    Leroy, kende dos siman pasa a cumpli 15 aña di edad, a pidi e homber pa lage na paz.  Pero e homber a bolbe pushe y a haci mesun pregunta.  Aki diripiente dos muher a yega cerca y a cuminza mete cu nan.

    E momento ey Julie a saca su smartphone y a cuminza graba loke ta pasando.  E video aki a bira viral y a bay rond mundo.

    E trio di color blanco, aparentemente tabata bao influencia y tabata cana cu algun bleki grandi di cervez.  Nan a cuminza grita y dirigi cantidad di palabra racista den direccion di e hoben, y el a trata tambe di crea confrontacion fisico.

    Dado momento Leroy a cuminza mustra nan claramente cu e ta cuminza rabia.  Despues e hoben tambe a lanza algun palabra malo y despues el a grita nan: “Boso boca ta hole stinki”.  Esaki tabata berdad, pasobra nan tabata pata-pata di alcohol den nan curpa.

    Despues den forma di trinshon, e homber di 35 aña a rek y benta Leroy for di e plataforma, y bente abao riba rails.  Aki e hoben a recupera mesora y a purba di subi bek.  Pero e homber a trata di evita esey, y Leroy na su turno a dicidi na ranca e homber abao, y el a cay basta duro riba e rails.

    E dos muhernan tambe a baha cu intencion di wanta Leroy pa asina e homber por atake cu facilidad.  Por a nota cu Leroy no tabata kier a dal e muhernan.  Esey ta debi cu el a haya tres aña di les di Kickboxing, y e sa di disciplina y tecnicanan cu e no mag di usa riba caya.  Pero di dos biaha si el a haya cu awa a pasa hariña, y el a cuminza scop y manda mokete riba e homber.

    E momento ey e señal a sona cu trein ta na caminda.  Aki ta unda e ruman muher di Leroy a dicidi na baha y e si a bay riba e muhernan, y nan a keda basta suf eybao.  E ruman a haci esey, pasobra e otro hendenan den Stacion kier a haci nada.

    HOMBER TA CONOCI DI POLIS:

    Polis a wordo yama, y nan a yega y aresta e dos muhernan.  Pero e homber a core bay sconde.  Finalmente nan a logra haya e homber Jonas V. scondi den toilet di e Stacion di Trein.  El a wordo aresta.  Y tur esaki djis pasobra Leroy tabatin un otro color di cuero.

    Na final, Leroy Abraham den un entrevista cu prensa di Belgica, a bisa cu e tabatin miedo di muri riba e railnan.  Ora cu el a wordo ranca y pusha abao riba e rail, segun Leroy, el a spanta masha hopi mes.

    E sospechoso Jonas V. ta un conocido di Polis y di Ministerio Publico.  Na comienzo di aña mes el a wordo sentencia debi na pelea di aña pasa Augustus.  Sin ningun motibo el a dal un hende, y menaze cu cuchiu.  El a haya castigo condicional di 10 luna di prison, y cu e mester keda leu di droga.

    REACCION DI ALCALDE:

    Alcalde di Aarschot a laga sa caba e siman aki cu el a keda den shock pa e imagennan di e pelea na e Stacion di Trein.

    “Esaki por tabatin final fatal y ta inaceptable.  Aki hendenan por a keda gravemente herida of peor,” el a bisa.  El a bisa tambe cu e tono racista cu aki ta lage hopi preocupa.

    Den un entrevista cu Radio-2, e Alcalde a laga sa cu su punto di bista ta cu si acaso resulta cu racismo ta e berdadero motibo pa e pelea aki, e ora esnan culpable mestre wordo castiga na un forma severo.

    Riba e potret aki por mira Leroy cu su mama Ana, cu kende el a bay entrega keho na Polis.

    - Advertisement -

    DUNA COMENTARIO

    Please enter your comment!
    Please enter your name here