Home Cultura Atencion special pa Papiamento na conferencia di “Society for Caribbean Linguistics” na...

Atencion special pa Papiamento na conferencia di “Society for Caribbean Linguistics” na Costa Rica

50
0
SHARE
- Advertisement -

ORANJESTAD   (AAN):  Society for Caribbean Linguistics (SCL) ta un organisacion linguistico cu ta dedica su mes na estudio cientifico di e idiomanan di Caribe y na distribucion di resultado di investigacion teorico y aplica di su miembronan.

Na 1968 tabatin e Creole Linguistics Conference na Mona, e campus di The University of the West Indies (UWI) na Jamaica y aki e idea pa lanta e sociedad a cuminsa crece. Na juli 1972 SCL a keda formalmente estableci na St. Augustine, e campus di UWI na Trinidad. For di e tempo ey cada dos aña SCL tin su conferencia na un pais den Caribe.

Na 1980 y na 2014 e conferencia a tuma luga na Aruba. E aña aki e di 22 conferencia a tuma luga na Costa Rica, di dia 6 pa 10 di augustus ultimo, cu e tema Connecting the Caribbean: Languages, Borders and Identities.

SCL ta bon na haltura di e situacion di e idiomanan den Caribe, p’esey no ta nada straño cu su directiva a dicidi di dedica atencion special na Papiamento cu a cumpli e aña aki 15 aña como idioma oficial di Aruba.

Tabata un honor grandi pa Fundacion Lanta Papiamento, ora cu su vice-presidente Joyce Pereira a haya e invitacion pa tuma un di e charlanan principal na su encargo y duna un tayer di Papiamento na 40 studiante di Universidad Nacional, Facultad de Filosofia y Letras, durante e conferencia aki.

Ta claro cu Joyce Pereira a acepta e invitacion aki y a prepara e charla y e tayer. E charla tabatin como titulo: Papiamento, a linguistic treasure: reviled and cherished – from negative to positive language policy and planning in the Aruban society and education. E tayer a hiba como titulo: Cera conoci cu e idioma Caribense Papiamento.

Tur dos actividad tabata exitoso y a ricibi hopi comentario positivo. Un momento di sorpresa tabata ora e sociedad a eligi Joyce Pereira como vice-presidente di 2018 te 2020. Esaki kiermen cu di 2020 te 2022 automaticamente e lo ta presidente di SCL, e di dos presidente di SCL procedente di Aruba, despues di Ramon Todd Dandaré Mag. Ling., kende tabata vice-presidente di 1978 pa 1980 y presidente di 1980 pa 1982.

Nos por ta orguyoso cu den Caribe tin asina tanto atencion y admiracion pa Papiamento, specialmente como cu den comunidad e ta asina fuerte y tambe como cu e ta hayando su caminda pa drenta enseñansa.

Ta masha importante pa tene e contacto cu nos coleganan den Caribe bibo, specialmente pa loke ta investigacion cientifico.

Fundacion Lanta Papiamento su deseo ta pa mas linguista y docente di idioma bira miembro di e sociedad aki. Den e proximo lunanan FLP lo duna informacion tocante Society for Caribbean Linguistics y su metanan. E preparacionnan pa e conferencia di aki dos aña, cu lo ta na Trinidad & Tobago, a cuminsa caba.

Riba potret: E directiva pa 2018-2020 di Society for Caribbean Linguistics

 

 

- Advertisement -

DUNA COMENTARIO

Please enter your comment!
Please enter your name here