ATIA ta reconoce aporte di comercio pa mihor maneho di desperdicio

    63
    0
    SHARE
    - Advertisement -

    ORANJESTAD (AAN): Ministro Otmar Oduber a tene Diahuebs un encuentro cu Bestuur di ATIA pa locual ta trata e tema ‘Waste Management’ Maneho di Desperdicio. Segun e mandatario e reunion aki a bay sumamente bon, na unda cu por a informa ATIA di e ultimo desaroyonan cu ta tumando lugar cu Parkietenbos.

    Un di e ultimo desaroyonan ta cu na e momentonan aki, un averahe di 5 mil ton di sushi ya no ta bayendo Parkientenbos mas. E decision ta, cu Gobierno kier busca un incinerator pa cuminsa cu e proceso pa remedia Parkietenbos, baha e nivel di e sero di sushi y den futuro hacie un luga atractivo.

    “Nos ta agradecido na cada partner cu a duna di nan parti pa awe nos por cuminsa cu e proceso di RFP (Request for Proposal). Alaves, e ta algo sumamente positivo pa scucha di parti ATIA, cu comercio tambe mester aporta na e problematica aki di sushi y lo no tin problema si mayan mester cuminsa cobra pa recoge sushi, Minister Oduber a bisa.”

    Presidente di ATIA sr. Ronald van Trigt a duna di conoce cu ATIA for di cuminsamento tabata forma parti di e grupo cu a bin cu e idea di Minister Otmar Oduber pa den un tempo corto busca solucion pa Parkietenbos.

    ‘Parkietenbos su dump no ta pertenece na Aruba mas, e ta un cos cu ta haci hopi daño na nos hendenan y tambe pa nos turismo y tur locual cu nos kier logra pa Aruba. Nos ta di acuerdo cu e situacion di cu manera cu e proceso di maneha desperdicio actualmente no por sigui mas, e discusion ta con nos ta bay for di punto A pa punto B.’

    ATIA tabata den e comision cu a trata puntonan di Serlimar cu ta encera entre otro con por bin cu un proceso cu ta bay funciona den futuro. Pa cual a delibera cu Minister con comercio ta bay duna sosten na e plan di continuacion (for di A pa B), unda cu lo bin cu un incinerator cu ta encera e proceso cu lo comberti sushi pa energia, cual ta un plan cu ATIA ta sostene completamente.

     

    - Advertisement -

    DUNA COMENTARIO

    Please enter your comment!
    Please enter your name here