Home General Autoridad cu dolor di cabez investigando posible asesinato na Shiribana

Autoridad cu dolor di cabez investigando posible asesinato na Shiribana

1050
0
SHARE
- Advertisement -

ORANJESTAD (AAN): Diadomingo a habri hopi druk pa Autoridad Hudicial na Aruba.  Esey ta relaciona cu un posible caso di asesinato cu a socede na Shiribana, Paradera.

Testigonan a mustra cu for di den oranan trempan di madruga caba, nan tabata mirando un auto staciona dilanti Lox Sing Supermarket, y e persona tabata haci movimentonan raro, y hasta grita pa hala atencion.

Aparentemente ningun persona no a haci hopi caso di esaki.  Te ora cu solo a cuminza sali.  Banda di 6:40 am, Central di Polis a ricibi yamada cu tin un homber sinta den un auto dilanti Subway Paradera y no ta duna señal di bida.

Ora cu Polis a yega, nan a bin nota cu ta trata di un Hyundai Elantra color shinishi-scur cu number A-51197, staciona casi na e final banda pabao di e parkinglot dilanti Lox Sing Supermarket.

E glasnan parti paden di e auto ta loke na hulandes ta bisa “beslaat” (ingles: fogged up) pues bo no ta mira bon paden.

Tog a nota cu tabatin un persona sinta paden cu no ta reacciona cu nada.  Tambe Polis a mira cu tin un waya di cellular-charger mara rond di su cabez, y tambe e headrest di e asiento.  E faha di Seatbelt tambe ta hopi raro.  A sigui mira, y nota cu su mannan tambe ta mara.

Polis a cuminza pidi pa demas autoridad presenta, mientras cu nan a kibra e bentana patras.  Asina a logra kita e lock y habri e porta patras, y a check su pulso.  A nota cu e curazon no ta bati mas.

Ambulans tambe a yega, y Paramediconan a detecta mesun cos, esta cu e persona no ta reaccionando.  Asina a pidi pa manda Docter y tambe demas autoridad.

Dr. Texeira a yega y pa 7:50 am a constata morto di e persona masculino.  Recherche di Noord a yega na e lugar, hunto cu Departamento Forensico BFTO di Polis, como tambe Slachtofferhulp.

Recherche a mira cu e vehiculo tin masha hopi detaye importante tur caminda tanto paden y pafo di e Hyundai.  Pesey nan a tuma e decision pa sella e vehiculo, y hibe cu Takelwagen intacto rumbo pa Warda di Polis pa haci investigacion.  E restonan mortal di e homber keto bay tabata den e vehiculo.

Te cu Diadomingo mainta, Polis a revela cu nan no a logra identifica e persona.  Pero alrededor di 12:30 pm, Polis a revela cu e victima a wordo identifica como Giovanni Javier Kock, naci na Aruba dia 30 di Juni 1971.  E persona aki di 47 aña di edad ta biba na Sero Pita.

Recherche a interoga testigonan den e area, y posiblemente lo bay usa Security Camera di diferente negoshi den e area, pa asina mira si acaso por a capta loke a socede.

E ta parce di ta un asesinato, den sentido cu un persona sinta parti patras di e asiento lo a choca e persona cu e waya di Cellular Charger.  Pero Polis no kier bisa nada, pasobra e investigacion tin di cana su caminda.

Cualkier persona cu por sa mas di e caso, ta ser pidi pa duna informe via Tipline di Polis na 111-41.

- Advertisement -

DUNA COMENTARIO

Please enter your comment!
Please enter your name here