Home Parlamento Awor gobierno kier dialogo riba salario minimo

Awor gobierno kier dialogo riba salario minimo

83
0
SHARE
- Advertisement -

Parlamentario Michael Lampe, ningun dialogo riba medida pero

ORANJESTAD (AAN): Cu hopi asombro tur hende a tuma nota di declaracion di tanto prome minister como minister di asuntonan social, kendenan durante conferencia di prensa, a informa cu gobierno lo bay reanuda e serie di dialogo nacional, pa atende cu e tema di aumento di salario minimo.

Palamentario di fraccion di AVP, sr Michael Lampe a mustra cu e asombro cu por sinti den comunidad, ta pa e hecho cu desde cu gabinete Wever Croes a asumi gobernacion di e pais, no a organisa ningun dialogo nacional pero a tuma decision tras di decision, medida tras di medida contra pueblo, sin cu a sinta na mesa y atende tur e decisionan aki cu instancianan local.

“Aki tambe nos tin cu remarca cu pa e gobierno di coalicion MEPPORRED tabata dificil tambe pa sinta na mes cu organisacionnan y instancianan den comunidad, pa falta di un plan di maneho ora cu ni sikiera un plan di gobernacion ta existi.

Semper mandatarionan solamente a papia di ‘acuerdo di gobernacion’ pero nunca a mustra pueblo un plan di gobernacion pa pueblo sa e rumbo totalmente opuesto y diferente cu e gobierno aki a tuma.

Gabinete Wever Croes  durante di campaña electoral a haci cantidad di promesa na pueblo, a priminti cantidad di decisionnan cu nan lo tuma pa  percura pa pueblo por sigui dilanti riba e caminda positivo y di progreso.

Loke tur hende por a mira te cu aworaki, ta un maneho dirigi pa ranca placa di pueblo, dirigi pa tuma medidanan cu nunca a wordo menciona durante di campaña, sigur e lema y promesa cu lo drecha situacion financiero tin cu mester tuma medida.

Sinembargo tur loke pueblo a ricibi te na e momentonan aki, ta medida tras di medida, caminda gobierno a dicidi cu e lo tin cu saca 130 miyon for di cartera di pueblo y pa colmo sin na cualkier momento, splica pueblo kico ta bay haci cu e placa aki.

Cantidad di otro promesanan haci, manera cu lo baha prijs di gasolin, lo reduci prijs di awa y coriente, cu lo baha edad di pensioen a keda sin wordo cumpli, principalmente e promesa grandi cu lo bay aumenta salario minimo ya cu e gobierno actual den su tempo den oposicion, a insisti u pueblo no por sigui biba cu e salario minimo cu tin aworaki.

Tin politiconan cu awe ta minister den sala di parlamento y durante di campaña a insisti cu e ‘bestaand minimum’  mester ta di 2200 florin ya cu nan no ta mira con un famia por biba cu e salario minimo di awendia.

Nuebe luna a pasa bay caba y gobierno no a cumpli cu practicamente ningun promesa haci, al contrario bou di e gobierno aki prijs di combustibel ta sigui subi, ta sigui aumenta cu yudansa di entre otro e mesun gobierno aki, cu a dicidi cu e lo saca 10 miyon florin cu introduccion di accijns riba gasolin.

No ta conoci di ningun negociacion di gabinete Wever Croes cu ningun gobierno di ningun pais pa trata di importa gasolin na prijs barata y for di ayera gasolin a bolbe aumenta cu mas cu dos cen pa liter.

Awor tanto prome minister como minister di asuntonan social a dicidi di reintroduci dialogo nacional pa bay discuti principalmente cu instancianan di sector priva, riba aumento di salario minimo, un dialogo cu practicamente ta destina pa fracasa.

Ta con un gobierno cu tanto CAFT y gobierno di Reino como tambe Raad van Advies a mustra cu a aumenta gasto di personal di gobierno den apenas 9 luna di gobernacion, por sinta na mesa y busca comprension y cooperacion di sector priva pa realisa un promesa cu partidonan den gobierno a haci.

Na prome luga gobierno a crea un situacion serio pa economia di nos pais cu introduccion di aumento di BBO y BAZV cu fraccion di AVP na varios ocasion a mustra cu esakinan lo crea un situacion caminda ‘the cost of doing business’ na Aruba, ta bira mucho mas caro.

Medidanan no solamente a afecta cartera di e ciudadanonan pero a crea incomodidad financiero y economico pa sector priva, ya cu na momento cu pueblo tin menos pa gasta, esaki lo perhudica tambe companianan local den nan maneho.

Awor ta con gobierno por tin e curashi y pudor di awo numa dicidi di bay organisa dialogo nacional, mientras cu ningun momento a sinta dialogo cu sector priva prome cu a tuma medida pa mira e impacto cu esaki lo tin riba negoshinan di nos isla.

No a sinta discuti den un dialogo nacional riba plan di gobierno, riba maneho di gobierno of e rumbo sikiera cu gobierno lo kier sigui pero di otro banda por a mira cu a tuma mas cu 400 hende na trabou, a emplea sostenedonan di partido y a percura pa acomoda sponsornan di campaña cu contractnan lucrativo.

Gobierno no tin argumento valido pa manda yama un dialogo nacional cu esunnan cu e mes a perhudica formalmente cu su maneho sin pia ni cabes,” Parlamentario Michael Lampe a declara.

- Advertisement -

DUNA COMENTARIO

Please enter your comment!
Please enter your name here