Awe rotonde di Tanki Leendert ta wordo habri pa trafico
ORANJESTAD (AAN): Relaciona cu e trabaonan cu ta tumando lugar den e dianan aki riba caminda di Tanki Flip-Noord, director di DOW, Ing. Marlon Croes a indica cu mientras cu ta haciendo kitamento di e capa di asfalt y e recap di e caminda aki, DOW lo traha riba un banda di caminda so pa asina e trafico por circula na e banda cu ta keda habri.
Automobilistanan di e manera aki lo por sigui pasa riba e caminda aki y bishita e comercio cu tin den e becindario.
DOW ta pidi esnan cu ta circula e caminda aki, pero cu no tin un motibo urgente pa pasa eynan, y si no mester bay den un di e negoshinan of no ta un residente, pa haci uso di e rutanan alternativo. Di e forma ki lo por coopera pa e trabao bay di un manera mas facil.
Segun Croes, kier duna garantia na e negoshinan cu nan ta keda opera y cu nan clientenan por tin acceso na nan lugar.
Un “town-hall meeting” a tuma lugar tambe cu e comerciantenan y a splica nan con e trabao ta tuma lugar pa nan por garantiza nan acceso.
TANKI LEENDERT
Pa loke ta e area di Tanki Leendert, Marlon Croes a bisa cu DOW a cera e caminda ora cu scol a cuminza. Ta bay dura 12 siman (3 luna).
Awe diasabra e rotonde lo wordo habri pa alivia e fluho di trafico riba e caminda aki, cual ta bira un caminda alternativo pa yega Oranjestad, a indica.
Kiermen, e rotonde banda di cas Casuela lo wordo habri pa bay zuid-noord. Esalo lo alivia e fluho di trafico relaciona cu e otro trabaonan cu ta tumando lugar.
