Home Gobierno Carta di CAft pa Gobierno ta mustra cu nos pais ta recobrando...

Carta di CAft pa Gobierno ta mustra cu nos pais ta recobrando su credibilidad financiero

17
0
SHARE
- Advertisement -

Minister Xiomara Ruiz-Maduro:

ORANJESTAD (AAN) – Minister di Economia y Finanzas sra. mr. Xiomara Ruiz-Maduro, a elabora den conferencia di prensa gubernamental, Dialuna, riba e rapport financiero cu College Aruba Finacieel Toezicht (CAft) a ricibi di gobierno, riba cual e instancia aki di supervision financiero a reacciona cu un carta positivo.

Na un forma optimista e dignatario a cuminza bisando cu e Dialuna aki a cuminza cu un bon noticia, y esaki ta cu Aruba ta un paso mas cerca pa recobra e credibilidad financiero den nos pais. E di dos cuartal a keda cla y esaki a wordo presenta na CAft.

Siman pasa CAft a duna su opinion riba esaki, t e mandatario a expresa cu pa hopi tempo gobierno di Aruba no ta ricibi un carta asina positivo.

E dignatario a indica cu hopi biaha, y sigur durante e gobierno anterior CAft tabata manda carta den cual nan tabata indica cu nan ta mira cu tin cosnan cu no ta realistico, specificamente den e rapportnan di cuartal.

Aworaki, den e rapport di e prome cuartal y sigur e di dos, por mira cu e ta bira diferente, pues mas positivo loke ta mustra cu Aruba ta recobrando su credibilidad financiero.

E mandatario a splica cu semper nan ta warda un rato riba e opinion di CAft tocante e cifranan di cuartal, y hunto nan ta manda nan na Parlamento pa nan por sigui e proceso di e presupuesto 2018.

Diahuebs awor gobierno lo ta den Parlamento pa asina nan por brinda informacion y contesta nan preguntanan riba esaki.

E carta di CAft ta referi na e cifranan di e prome mitad di aña 2018 unda nan ta mustra cu e deficit pa e aña aki ta bay bira menos cu na 2017 manera a wordo palabra.

CAft ta conseha pa yega na un palabracion nobo cu Hulanda di 2018 te 2021, cu ta algo cu no a culmina y ta andando te ainda, pero tin cierto puntonan riba cual Aruba y Hulanda a concorda cu otro con ta sigui cu e periodo 2018 nos dilanti te cu 2021.

Relaciona cu e reduccion di personal pa 2018, a palabra cu CAft cu na October venidero lo trece un cambio den e presupuesto y e ora ey lo presenta kico e cambionan ta pa e aña aki y mira con leu gobierno por yega cu e ehercicio aki.

E mandatario a subraya cu pa prome biaha gobierno ta bay traha concretamente riba bahamento di gasto di personal. Hulanda for di basta tempo ta treciendo e preocupacion aki dilanti, unda cu pa largo tempo gobierno anterior a indica cu nan ta bay haci ehercicio riba esaki, pero a keda na palabra bunita pero nunca a concretiza pero mas bien e gastonan di personal a aumenta.

CAft ta pone cu e ehercicionan cu gobierno mester haci na e momentonan aki ta bira un tiki mas dificil.

Minister Ruiz-Maduro a señala cu gobierno tin e normanan pa e deficit, cu mester cumpli cune, y tin normanan tambe pa e debe y aworaki tin tambe un norma pa locual ta gastonan di personal. E gastonan aki ta bira inherente na e otro normanan relaciona cu e deficit.

Pero den e palabracion cu Hulanda nan kier un tiki mas specifica pa por wak e progreso den bahamento di gasto y pesey nan kier mira un norma apart.

Kiermen, gobierno aworaki mester tene cuenta cu tres norma: 1. E deficit. 2. E debe. 3.Gastonan di personal.

- Advertisement -

DUNA COMENTARIO

Please enter your comment!
Please enter your name here