Home Gobierno Casi 100% di e personanan cu a pidi asilo na DIMAS tabata...

Casi 100% di e personanan cu a pidi asilo na DIMAS tabata na Aruba caba como turista

13
0
SHARE
- Advertisement -

Segun directora di DIMAS

ORANJESTAD (AAN): E tema di asilo ta uno cu sigur ta andando pa algun luna caba. Tabata tin henter un proceso di discusion riba esaki. Yen di hende a yena papel y a para den rij na Dimas.

Proceso ta cu tin cu yena un formulario y tin cu warda un contesta, cu no ta keda cla for di awe te mañan. Directora di Dimas, Kathy Ruiz-Paskel a splica cu semper como Dimas tabata e instancia cu ta encarga cu e parti di atende cu peticionnan pa asilo.

Den añanan anterior no a ripara esey hopi pasobra e tabata montantenan cu no tabata surpasa 10 pa aña. Eseynan ta atende den comisionnan multidisciplinario, unda cu tin diferente servicio di gobierno. For di nan punto di bista di experticio ta drenta aden y ta evalua cada caso individual.

Contrario na e añanan anterior, a nota un volumen di hendenan cu a bin pidi y a haci peticion segun e tratado. Na Mei a wak un momento ora cu informacionnan a pasa rond cu Dimas ta dunando un pardon of algo parecido, causando dos dia di rij largo.

Pero na Mei tambe a introduci un formulario pa esnan cu ta aplica pa un tipo di permiso asina, adelanta ta yena e plania eynan, unda cu nan mes, den nan mesun palabra nan ta splica y duna informacion pakico nan ta kere cu nan lo mester bin na remarca pa esey. Esey no ta kita cu e tratado mes ta papia di un hende cu ta bin pidi na frontera. Esey a keda avisa na diferente conferencia tambe tanto door di e minister y tambe door di Ruiz-Paskel mes. Pero na e momento ey a wak cu tabata tin personanan pa hopi motibo, mas tanto economico cu a pensa cu lo tabata tin un permiso cu por a wordo duna na nan. Esey no ta e caso.

Dimas a haya e planianan ey, cual ta yena un pa famia. E tempo ey piek cu a haya di Mei, a haya mas di 130 peticion, di cual cada plania tabata mara na x cantidad di hende si tabata persona, casa, yiu, yiunan of tin di nan tabata nan so tambe. Eseynan Dimas tin basta di nan procesa. Pero e ta asina si cu despues di esey a haya algun tambe cu a pidi via frontera y tur eseynan ta bezig ta atendiendo den e comision. Segun cu e informacionnan ta drenta pa e ora yega siguientemente na un decision.

Si e hendenan ta haya cierto derecho ora di entrega tipo di plania asina, no ta asina cu nan no ta haya un derecho. Ley ta papia cu e persona cu drenta na frontera y pidi pa proteccion, por haci un peticion pa haya un permiso provisorio pa e duracion di e tramite di e permiso.

Den e caso di e grupo grandi cu por a mira na Mei, lo por bisa cu 99.9% tabata hendenan cu ya caba tabata na Aruba y no tabata cumpli cu e parti di rekerimento di a pidi na frontera. Nan no a haya e documento ey. Den nan caso, si nan a drenta legal y e termino di estadia turistico a vence, por lo tanto e ora nan ta den nan fase cu nan ta ilegal.

Esunnan cu a drenta clandestino tabata ilegal desde comienso. E hecho cu a entrega un plania, no a duna ningun derecho segun nos leynan di admision pa un permanencia na Aruba.

Dimas si tin e obligacion di trata e peticion. Nan ta haya un no y tambe nan tin derecho di apelacion. Esey ta un proceso cu ta canando. Ya caba diferente hende a ricibi nan contesta.

E contesta negativo

E parti di contesta negativo, e comunicacion eynan por monitor via sistemanan si sali via legal. E otro parti ta cu si e ta den no sali y wordo haya, lo bo haya cu otro partinan den e cadena di stranheria lo bay atende cu nan, pero riba e parti di expulsion. E por sosode si tin un bon comunicacion entre Dimas y e respectivo departamentonan.

Tin un situacion fastioso na momento cu tin un beschikking cla pa entrega e personanan y e beschikking ta bay y no por wordo entrega. Esey ta un berdad hopi fastioso. Pero den tur caso tin un decision tuma. E decision ey ta registra den sistema. Na momento cu tin cualkier duda y por ehempel autoridad di control encontra cu un persona asina, e semper lo por na e momento ey, avis’e cu den e sistema ta aparece cu e peticion ta nenga caba.

Ilegalnan na trabao

Den e caso aki, Dimas mes no tin e parti di control bao di dje. E parti ey ta cay bao di Warda nos Costa. Sigur Dimas ta wak actualmente den luna di Augustus, rapportnan drentando di diferente instancia cu ta wordo bishita pa controlnan rutinario y den e controlnan ey ta topa cu personanan cu no tin un permiso valido.

Hopi di nan ta drenta como turista. E tin consecuencia tanto pa e persona ilegal, cu na e momento ey a wordo gara pa autoridad y ta cana e proceso pa wordo deporta. Pero tambe pa e dunado di trabao cu a tuma un persona cu ta legal, ta sigui e ora e proceso di boet. E personanan ey awor aki lo haya carta.

Empresanan lo haya carta unda cu lo duna nan chens prome pa reacciona riba e intension pa duna nan un boet y despues di esey e proceso lo sigui, unda cu lo emiti un boet, si no tin motibonan cu nan por presenta cu ta valido y despues di esey lo sigui e parti di colecta e boet.

E parti ey Ruiz-Paskel ta wak ta biniendo atrobe. Dimas lo bay traha estrechamente cu e departamento concerni tambe pa e ora eynan, pa wak cu e parti aki cana su caminda manera cu mester cana segun ley, el a bisa por ultimo.

 

- Advertisement -

DUNA COMENTARIO

Please enter your comment!
Please enter your name here