Home Hudicial Cinco aña di prison exigi pa homber cu a viola un muher...

Cinco aña di prison exigi pa homber cu a viola un muher di bida y menaza otro cu cuchiu

300
0
SHARE
- Advertisement -

ORANJESTAD (AAN): E Venezolano di inicial G.I. riba Diabierna mainta a scucha Fiscal exigi 5 aña di prison p’e. Fiscal ta haya G.I. culpable di a viola un muher di bida y a menaza un otro cu cuchiu. Abogado mr. Yarzagaray ta haya cu no tin prueba concreto y a pidi Hues pa declara G.I. liber.

ACUSACIONNAN :

E acusacionnan cu Fiscal a presenta Diabierna mainta den Corte di Husticia contra G.I. ta cu riba 13 Januari 2018, a viola un muher di bida. Tambe cu riba 15 Januari 2018, o sea 2 dia despues a purba viola un otro muher di bida y subsidiario a menaza e muher di bida cu cuchiu.

SCUCHA DOS TESTIGO:

Ta asina cu dos testigo a worde scucha den Corte, ta trata aki di e homber B. y su tata L.B. kendenan ta bisiña di G.I. y a mira loke a sosode dia 15 Januari 2018.

Hues a puntra e testigo B. kico el a mira. B. a bisa Hues cu e tabata den cura y el a mira G.I. cu un muher den auto para na G.I. su cas. Nan ta bisiña. El a mira G.I. baha for di auto cu e muher y bay den cas. Tabata anochi y despues el a scucha gritamento di e muher “auxilio, nan ta mata mi” y el a bay wak kico tabata pasando. El a bula e cura y a mira G.I. cu un cuchiu den man y e otro man gara na e muher su garganta. E muher tabata grita pa ayudo. B. a bisa G.I. kico e ta haciendo y e momento ey G.I. a paga e luz. Segun B. el a bay yama mama di G.I. cu ta biba den e di dos piso y a bisa e mama cu G.I. tabata abusando di un muher.

El a bay cu e mama patras y a haya G.I. cu e muher. E muher a core sali full sunu. Un otro bisiña a bay yuda e muher y bay cun’e. Segun B., otro bisiñanan a sali y despues Polis a yega. G.I. a bay sconde y despues di buskeda den e cas, Polis a haya G.I. y a deten’e.

Despues a scucha e tata di B., L.B. E tata tambe a mira G.I. cu cuchiu den man y e muher gara.

VIOLA UN MUHER DI BIDA:

Hues a mustra cu un muher di bida a denuncia cu dia 13 di Januari 2018, G.I. a viol’e. Segun G.I. el a paga e muher pa tin relacion sexual cun’e. El a sigui bisa cu despues di tabatin relacion cu e muher den su auto, el a hiba e muher back na un bar. Hues a bisa cu e muher di bida a bisa cu ora el a drenta den e auto, G.I. a saca cuchiu p’e y a force tin relacion sexual cun’e.

Segun G.I., e no a forza e muher y tampoco a saca cuchiu. Hues a bisa cu e muher a bisa cu G.I. a core su tras y mar’e cu tape. Segun G.I. el a tene relacion cu e muher den su auto. Segun e muher, G.I. a ranca na su cabey y cu G.I. a menaza cu cuchiu.

PURBA VIOLA Y MENAZA CU CUCHIU:

Dia 15 Januari 2018, un auto a pasa den un caminda pero tin un otro auto blokea caminda. Diripiente un dama sali for di auto y core drenta e auto y bisa cu nan kier mat’e. E muher ta un muher di bida.

Polis a bay na cas di G.I. y a haya mancha di sanger pero no a haya G.I. Polis a sali pafor y bisiñanan a bisa cu G.I. ta den e cas. Polis a bolbe bay busca y den di dos piso a haya G.I. scondi mey mey di dos colchon.

Hues a puntra G.I. kico a pasa. Segun G.I. e muher tabata cun’e y no tabata sunu. El a bisa cu e homber B. a dal’e mokete den boca. Hues a mustra cu e muher a bisa cu el a worde menaza pa G.I. cu cuchiu. Segun G.I. el a paga e muher 250 Florin pa tin relacion sexual cun’e. Segun G.I. e muher a cuminsa grita pasobra e tabata kier mas placa. El a bisa Hues cu nan no tabatin relacion sexual. Pa loke ta declaracion di e testigonan, segun G.I. no ta berdad.

Hues a mustra cu G.I. tin carchi di castigo y segun informacion na 2013, G.I. a worde condena pa atraco cu violencia na 5 aña di prison.

EXIGENCIA DI FISCAL:

Fiscal a bisa Hues cu e caso di dia 13 Januari 2018 a scucha e amiga di e muher di bida, kende a bisa cu el a mira cu e muher di bida tabata maltrata. A haci investigacion forence riba condom cu G.I. a usa y ta mustra cu ta e sospechoso G.I. Fiscal a bisa Hues cu mester a haci tur esaki pasobra e sospechoso G.I. no kier a papia nada.

A haya tape cu a usa pa mara e muher. E agentenan cu a papia cu e muher a mira cu e tabatin marcanan di mara na man. Despues di 7 luna y mey awor den Corte, G.I. ta bisa cu e relacion tabata voluntario. Fiscal a bisa cu e ta kere mas e muher victima, e amiga y loke Polis constata. E ta haya legalmente proba cu G.I. a viola e muher di bida.

E di dos caso riba 15 Januari 2018, tambe Fiscal ta haya legalmente proba. E victima a keda desconoci pasobra el a core bay. Sinembargo tin suficiente indicacion kico a pasa. Bisiña a bay mira kico tabata pasando ora cu a scucha gritamento pa ayudo. A mira e muher sunu y cu G.I. tabatin un cuchiu den su man. E muher di bida a contra un persona cu a yud’e cu e tabatin 30 minuut pa bay cu e homber G.I. El a bay den e cas, e portanan tabata sera, luz a paga y el a cuminsa kita su paña.

Segun Fiscal, aki por conclui cu e muher tabata haciendo su trabao pa cual a paga. Na opinion di Fiscal, e ta haya cu G.I. cada biaha ta crea un storia pa tur loke a sosode. El a mustra cu tabatin luchamento y e muher a bisa cu el a morde G.I. na su dede. Awor G.I. ta bisa cu ta su cacho a morde na su dede. Fiscal a bisa cu no por papia di purba viola y pidi Hues pa declara G.I. liber pa esaki pero si a keda proba e subsidiario esta menaza di cuchiu. Fiscal a exigi 5 aña di prison.

ABOGADO:

Mr. Yarzagaray a reacciona cu Fiscal ta bisa cu G.I. promer tabata keda keto pero G.I. for di principio a bisa cu el a tene relacion sexual cu e muher di bida y a usa condom. Despues el a hiba e muher back na e lugar na San Nicolas. E tambe a bisa cu e tabata dispuesto pa duna muestra DNA. E abogado ta haya cu G.I. a splica den detaye con tur cos a bay. E ta haya cu mester declara G.I. liber pa e promer acusacion.

Pa cu e di dos acusacion, abogado a remarca cu no por bay spera cu e sospechoso ta worde mal bati y cu e ta bay duna declaracion. El a remarca cu ta e aña aki na Februari e dos testigonan a worde scucha. Esaki no ta corecto. E abogado ta haya cu Fiscal a actua desespera pa purba haya prueba contra G.I. E abogado a bisa Hues cu e ta haya cu e declaracion di testigonan ta contradictorio y no por usa nan contra G.I. El a remarca cu no a scucha e muher di bida mes sino un persona cu a hiba e victima kende a bisa cu e victima a bisa di a morde e dede di e sospechoso y casi a kit’e afor. Esaki no ta cuadra cu e berdad. E sospechoso ta bisa cu ta su cacho a morde. E abogado ta haya cu no tin prueba di sosten y cu mester declara G.I. liber. El a mustra cu G.I. a declara cu el a paga e muher 250 Florin.

Hues a sera tratamento di e caso y a bisa cu dia 14 September 2018 lo por spera sentencia.

 

- Advertisement -

DUNA COMENTARIO

Please enter your comment!
Please enter your name here