Home Enseñanza Como 65 futuro docente di scol a cuminza cu nan estudio na...

Como 65 futuro docente di scol a cuminza cu nan estudio na IPA

46
0
SHARE
- Advertisement -

ORANJESTAD (AAN): Dialuna ultimo IPA a cuminsa oficialmente cu su aña academico 2018-2019 pa su studiantenan. Un total di 65 studiante nobo a cuminsa e aña academico aki cu nan estudio na IPA.

Ta trata di studiantenan cu a scoge pa haci e estudio di maestro pa Enseñansa Primario, Bachelor Papiamento y Movecion y Salud. E instituto ta sumamente contento pa e interes cu e hobennan y adulto di Aruba tin pa sigui un estudio den ramo di educacion.

E programa di siman di introduccion a inicia cu un discurso di directora general señora drs. Marilyn Richardson. El a yama henter e comunidad di IPA bonbini y alavez desea tur presente un aña exitoso. Den su discurso el a enfatisa e importancia di e profesion di maestro.

El a splica e studiantenan cu un maestro tin un rol grandi den e desaroyo y formacion di nos muchanan. Alavez el a duna e studiantenan un bista general di e proceso cu e studiante lo pasa aden pa desaroya su mes profesionalmente. El a pidi e studiantenan pa nan ta hopi dedica na nan estudio y pa nan haci nan maximo esfuerso pa bira un maestro extraordinario cual ta necesario pa sigui hisa e calidad di nos enseñansa y e desaroyo di nos muchanan.

Siguientemente  a introduci e team di docente,  personal di sosten y e klasnan. Sra drs. Melendy Neuman a declama su poesia Un Experencia  Nobo na e studiantenan, specialmente esnan cu a caba di cuminsa cu nan trayecto na IPA.

E poesia ta inspiracion y creaccion propio  di  señora drs. Neuman den cua e ta enfoca riba experencia nobo y e puntonan di atencion cu e studiantenan mester tene cuenta cu ne durante nan estudio na IPA. A clausura e parti oficial cu un icebreaker pa studiante cera conoci cu otro na un forma recreativo.

Despues di esaki e studiantenan a sigui cu nan mentor cu un programa di introduccion special. E siman di introduccion ta finalisa cu e asina yama IPA-Kamp cu ya a bira un tradicion den e prome siman na IPA. Esaki lo tuma luga diahuebs y diabierna binidero. Nos ta desea e comunidad di IPA y tambe tur maestro y tur nos muchanan den nos enseñansa na Aruba hopi sabiduria, bon motivacion, gran perseverancia y hopi creatividad y inspiracion p’asina 2018-2019 ta un aña escolar exitoso.

- Advertisement -

DUNA COMENTARIO

Please enter your comment!
Please enter your name here