Home Comentario Consumidor ta puntra unda control di prijs riba producto basico a keda?

Consumidor ta puntra unda control di prijs riba producto basico a keda?

12
0
SHARE
- Advertisement -

Comentario:

Pa Mercedes Monge

E consumidor no a scucha for di Gobierno cu productonan di e canasta basico por a aumenta di prijs, pero ora di haci compra y bay paga, por ripara cu, fuera di e impuestonan cu awor hende ta yama “crisis heffing”, e productonan como tal a bira mas caro.

Tin consumidor cu ta full confundi cu e lechi. Nan a tende cu esaki ta un producto cu prijs proteha, no obstante (y mi mes a constata esaki) un caha di lechi awa ta costando 4.50 florin.

Tambe a mira cu e caha di un docena di webo cu tabata costando un tiki menos di 3.50 florin a aumenta cu casi 2 florin.

Asina mes cu prijs di aroz, y aki tambe tin un poco confusion pasobra tin diferente tipo di aroz y e consumidor no sa cual ta esun proteha.

Esaki pa loke ta trata productonan di consumo basico, y apenas un par di producto, cu ya e consumidor no sa si nan ta den e canasta si of no, y cu tampoco a scucha nada mas di hinca mas producto, entre nan fruta y berdura.

E consumidor, ami entre nan, no ta kere cu carni por bira parti di e canasta basico. Esaki a wordo menciona algun luna atras ora un minister a bisa cu Aruba lo haya carni na hopi bon prijs for di Colombia. Si ta asina caba of no, e consumidor no sa. Pero si ta asina cu e carni a bira hopi y superlativamente caro!

Ademas di e productonan aki, mi a keda asombra cu e prijs di material di construccion, y mi ta refiriendo na cosnan simple cu no ta palo, mosaico, etc., pero un simple slang pa drecha algo den cushina unda awa tabata liek. Wel, cosnan cu antes tabata hopi barata mes awor tin un costo tres biaha mas caro.

Mi por imagina mi mes con e costo di material pisa di construccion ta aworaki. Ta berdad cu e pueblo ta kehando hopi di e peso cu crisis heffing ta haci riba nos tur. Pasobra mi no ta kere den e “filosofia di schouder mas hancho”. Cada un di nos tin cu haci hopi esfuerzo pa nos placa rindi pa paga loke nos mester pa nos sobrevivencia. E “homber chikito” no a aumenta su poder di compra, esun considera “clase media” ya ta acercando hopi na e “homber chikito” y e grupo cu tabata considera un categoria mas halto cu clase medio ta clase medio y si e situacion aki sigui asina, aki un tempo lo ni tin clase medio mas. Lo ta interesante si parlamento of gobierno, kizas conhuntamente, lo por a haci un analisis al respecto.

Pero volviendo na e punto di e comentario aki, cu mi a compila den e transcurso di siman di varios ciudadano, pero tambe di experiencia propio como consumidor, ta vociferando con e prijsnan di alimentacion, entre otro, a dispara bay sky high. E pregunta di e “siman”: na unda e control a keda?

- Advertisement -

DUNA COMENTARIO

Please enter your comment!
Please enter your name here