Home Parlamento Deficit di presupuesto 2018 lo mester baha mas ainda

Deficit di presupuesto 2018 lo mester baha mas ainda

18
0
SHARE
- Advertisement -

Parlamentario mr. drs. Richard Arends

ORANJWESTAD (AAN): Siman pasa e cuenta anual pa aña  2017 a worde presenta na gobierno. Mientras cu parlamento ainda no a ricibi esaki y tampoco Algemene Rekenkamer, cu ta e organo constitucional cu mester duna su conseho riba cuentanan anual, nos a tuma nota si cu Gobierno a adelanta su mes riba e proceso y ya caba a duna su opinion riba esaki. “Esaki ta un procedura cu nos ta lamenta,” Parlamentario Richard Arends di AVP a declara na DIARIO.

E parlamentario ta constata su cu aunke e deficit a worde aumenta pa aña 2017 cu 130 miyon na december ultimo, e deficit adicional a bin resulta di ta 90 miyon cu ainda ta cuestionable.  Loke ta un hecho ta cu e deficit di 2017 ta mas abou cu loke a worde presupuesta, y esaki ta nifica cu presupuesto 2018 mester ta mas abou cu presupuesto 2017, si sigui e ultimo conseho di CAft.

Nos ta papiando akinan di un diferencia di casi 40 miyon di Florin y nos kier sa con lo reduci e deficit di presupuesto 2018 mas ainda  den un periodo di tempo asina corto,” Parlamentario mr. drs, Richard Arends a declara durante e conferencia di prensa semanal di fraccion di AVP

Dia 1 di september, esta dentro di tres siman, Parlamento lo mester ricibi e presupuesto di aña 2019, miembro di fraccion di AVP a señala.  E parlamentario a sigui splica cu den e presupuesto aki, gobierno tin cu demostra con e ta bay reduci e deficit cu 130 miyon Florin, cu ta e diferencia entre e deficit di aña 2018 y e norma cu a worde palabra cu Hulanda pa aña 2019.

“Parlamento ainda no tin confirmacion riba e finalisacion di e negociacionnan ente Aruba cu Hulanda pa loke ta trata e cuadro financiero nobo. Gasto excesivo cu gobierno a cuminsa cune pa presupuesto 2018, manera gastonan di personal, tambe lo mester worde elimina segun e ultimo informe cu e ricibi di Gobierno, pero ainda no a ricibi nada.

Segun un mocion aproba unanimamente, Gobierno lo mester bin parlamento e luna aki pa duna un splicacion pa loke ta trata ehecucion presupuesto 2018.

“E splicacion aki lo mester inclui ehecucion  di e plan di personal cu gobierno a priminti cu pa 2018 caba lo reduci e gastonan di personal cu 12 miyon Florin, pero di esaki ainda nos no tin nada formal cu ta demostra esaki”

Como 12 miyon na gasto extra di personal  ta un suma cuantioso cu ta equivalente na salario promedio di 300 persona. Ainda  Parlamento no a ricibi copia di e Landsbesluit cu ta regla e areglo di VUT cual ta forma parti di e maneho di personal.

E falta di transparencia ta laga hopi di desea: Parlamento no a ricibi e ‘uitvoeringsrapportage’ pa e di dos kwartaal y otro informanan cu tabata usual, manera e.o. cantidad di personal, informenan riba entradanan di Gobierno, no ta worde publica mas.

Parlamento ta sperando tambe un cambio di e ley di supervision financiero. Mientras cu presupuesto 2018 ta a desvia subtancialmente di e ley aki, ainda Parlamento no a ricibi un concepto di ley cu ta regla e cuadro financiero nobo.

- Advertisement -

DUNA COMENTARIO

Please enter your comment!
Please enter your name here