Home Parlamento Democracia ta exigi Parlamento atende Citgo awor

Democracia ta exigi Parlamento atende Citgo awor

99
0
SHARE
- Advertisement -

ORANJESTAD   (AAN):  Na e momento cu Aruba a firma un acuerdo cu Citgo, pueblo no a ser informa debidamente kico e riesgonan grandi tabata pa Aruba. Hulanda a trece e peliger di un garantia di 300 Miyon dilanti, pero no tabatin informacion debido na pueblo riba  e aventura cu Citgo lo por bira pa futuro di e pais.

E creacion di Citgo Aruba Refinery N.V. a kita e bista for di e realidad Venezolano cu tabata e realidad di Citgo. Splicacion cu a duna pueblo hasta tabata mustra, cu Aruba lo mester a atende cu e “bon” Citgo y no e “mal” Citgo cu cual obviamente kier a relata na Citgo na Merca. Pueblo no tabatin e impresion legal corecto di e realidad.

Mientras Aruba tabata firma un contracto cu Citgo, desaroyonan importante tabata tuma luga. Gobierno Venezolano ta dicidi pa Citgo, cu ta subsidiario di PDVSA. Gobierno Venezolano ta dicidi pa e compania na Aruba tambe.

Por bay mas leu. Aruba no por a pensa na 2016 cu e lo bira parti di un aventura financiero di regimen Nicolas Maduro, e gobierno dictatorial cu tanto Comunidad Europeo como Merca ta sanciona cu medidanan economico. E lama den cual PDVSA kier nabega ta sumamente peligroso pa Aruba.

Cantidad di compania internacional ta trata di haya placa cu Venezuela debe nan. Venezuela ta bula di un posibel solucion monetario pa otro, sin por scapa. E ta mara na e yudansa di Rusia y China. Aruba no tabata sa cu riba Citgo tin un borg di 49.9 porciento (casi mita) di e balor di e compania di e compania Ruso Rosneft.

No ta e “bon” Citgo mester bin splica Aruba kico ta pasa, despues cu e situacion Venezolano y e realidad financiero malisimo di PDVSA a stop e plannan di Citgo na Aruba.

Prome Ministro di Aruba otro siman lo mester atende cu e hefe di Citgo, Asdrubal Chavez, primo di ex Presidente Hugo Chavez, cu mester maneha Citgo pafo di Merca pasobra a kita su visa Mericano.

China Comunista y Rusia ta e paisnan cu a evita un caida total di Citgo, PDVSA, Nicolas Maduro. Nan ta parti di e pakete cu Citgo ta trece Aruba cu ta core cu e riesgo grandi di un garantia di 300 Miyon.

Democracia ta exigi pa Parlamento, prome cu Gobierno yega na un areglo nobo cu Citgo cu no por a cumpli cu e areglo original, discuti Citgo atrobe y duna pueblo e garantia cu bienestar di Aruba ta garantisa.

DIARIO lo sigui tur desaroyo pa e pueblo di Aruba por ta sigur di un grandioso futuro di paz y trankilidad sin aventura importa.

 

- Advertisement -

DUNA COMENTARIO

Please enter your comment!
Please enter your name here