Home Deporte Deporte di Para-Taekwondo por yuda e personanan cu algun discapacidad mehora nan...

Deporte di Para-Taekwondo por yuda e personanan cu algun discapacidad mehora nan calidad di bida

57
0
SHARE
- Advertisement -

Luciano Mazzeo:

ORANJESTAD (AAN): Luciano Mazzeo ta un persona cu ta trahando basta duro pa Aruba por tin su participacion den e weganan para-limpico den e deporte di Taekwondo.

Den entrevista cu DIARIO, el a duna di conoce cu Para-Taekwondo ta un disciplina cu ta genera un mihor calidad di bida den e atleta como cerca su famia.

Akinan ta papiando di personanan cu tin algun tipo di discapacidad fisico of intelectual. Hopi di e atletanan cu tin un discapacidad, generalmente ta biba “scondi” for di e sociedad.

Por bisa cu ta un logro grandi, cu awor e disciplina aki di Taekwondo ta wordo inclui den pa prome biaha den e weganan para-olimpico di Tokyo 2020, y e bon noticia ta cu Aruba ta bezig preparando su team.

Segun Mazzeo, na Aruba, por ehemplo, tin varios grupo cu ta practica e deporte di Taekwondo na nivel para-limpico y tambe nan ta dedicando na promove otro deportenan specificamente para-limpico.

Den e caso di Taekwondo, cu ta un deporte desaroya caba locual ta haci ta adapt’e. Pesey a crea e concepto “para” cu den e caso aki kiermen “paralelo”, el a agrega.

A indica cu na Aruba falta motivacion y pesey Luciano Masseo a duna e informacion aki, pa motiba e personanan cu tin algun discapacidad como tambe nan famia.

Na 2012, Aruba tabata tin un campeonato mundial di Para-Taekwondo y despues di esey no a mira ningun desaroyo. Algun scol a presenta cu algun alumno handicap pero Mazzeo a remarca cu no a mira ningun avance importante pa loke ta e deporte aki.

Aworaki, a subraya, ta trahando cu un plan/structura di trabao. Na e momentonan aki tur cos ta wordo haci a base boluntario (ad honorem) y cu ayudo di algun sponsor.

Nan ta train cu un plan di dialuna pa diabierna atardi y e meta ta pa hacie dos biaha pa dia. “E atletanan paralimpico ta train te hasta mas duro cu un atleta regular. Den e caso di Elliott, nos a cuminza traha mas duro na Januari. E tin mitad braza y pesey tin desbalans muscular. Ora di core e ta haya dolor di lomba”, Mazzeo a indica.

Den e caso di e atleta Elliot, e atleta di para-taekwondo di Aruba, el a logra baha su peso di 98 kilo pa 79 kilo. Su forza motriz/muscular a crece hopi. Mas di 40%, e experto a laga sa.

Ta contando cu e sosten di CEMEDAR (Centro Medico Deportivo Arubano), a agrega. Ora cu Elliott a cuminza train, e tabata tin problemanan fisico (dolor na pia, man, enkel, etc) y banda di esaki Elliott nunca a haya rehabilitacion.

Aworaki e ta haya fisioterapia y tambe quiropractica como “sport massage” y terapia sicologico. Tin full un ekipo cu ta trahando den esaki y esey ta e planificacion y e trabao cu ta tumando lugar pa saca e deporte di Para-Taekwondo pa dilanti.

Mazzeo a señala cu Aruba ta un tiki laat pa e paralimpiconan. Por clasifica pa medio di ranking (prome 4 di e ranking). Na e momentonan aki tin 53, pero lo tin un clasificacion di februari te April 2020. Lo tin un torneo clasificatorio y pa drenta den e paralimpiconan mester ta den e promenan.

E meta den tur caso ta pa mas hende join e deporte aki. No mester ta pa bay participa den exterior solamente, pero como un actividad diario, un ehercicio semanal pa e persona cu discapacidad.

Hopi biaha e personanan cu discapacidad ta keda cera den nan cas. Nan no ta haci nada, no ta haci movecion y ta evita e contacto cu otro personanan, Mazzeo a subraya. Door di practica un deporte, e personanan aki por cambia nan estilo di bida, nan manera di biba.

Aruba Para-Taekwondo kier busca e manera di haya sponsors pa asina duna e deportistanan un incentivo door di no pone un peso financiero pa e atletanan.

Tambe ta di spera cu algun dia e organizacion aki por haya e oportunidad di traha na un otro nivel y te hasta otorga becanan na e deportistanan, Luciano Mazzeo finalmente a expresa.

 

 

- Advertisement -

DUNA COMENTARIO

Please enter your comment!
Please enter your name here