Home General Despues di hopi sacrificio e lucha di Raul Solognier ta cosechando fruto

Despues di hopi sacrificio e lucha di Raul Solognier ta cosechando fruto

71
0
SHARE
- Advertisement -

ORANJESTAD (AAN): For di hopi tempo caba, DIARIO a bin ta siguiendo e lucha di e ciudadano Raul Solognier, pa asina e busca un mihor porvenir pa su tres yiunan.  E tabata simplemente busca un mihor bienestar y derecho pa su yiunan.  Y asina a start un lucha di hopi aña, tanto na nivel Gubernamental como den Corte di Husticia, pa asina por duna e muchanan aki un mihor futuro.

Raul a splica cu ya e tin cuater aña bringando pa bienestar di su yiunan.  Y awor ta parce cu di berdad, solo a cuminza briya mas positivo pa nan.

Actualmente e ta residencia na Kansas City, Merca cu su pareha actual y su yiunan.

Sr. Solognier a cuminsa ta splica cu leynan na Aruba, no ta 100% perfecto. Ora cu e problemanan a start den su caso (y ta cosnan cu Sr. Solognier no tabata kier a bay den detaye ariba dje), el a bati alarma na diferente instancia.

Na Aruba, e conoce casi tur Instancia y Fundacion envolvi den esaki.  El a cana caminda y bishita tur, buscando pa haya oido y yudansa pa su yiunan.  E ta menciona aki e.o. Voogdijraad, Gobierno, Bureau Sostenemi, pero sin haya e oido cu e tabata tin mester.

Solognier ta pensa cu door cu leynan di Aruba ta proteha mama, y e mes como tata, tabata tin un “rol secundario”.

Tabata tin un total di 6 caso den Corte, di cual 2 ta den Prome Instancia, 2 den Hoger Beroep (esaki ta ultimo) y 2 den Caso Sumario.

El a lucha hopi, specialmente despues cu Aruba a keda sacudi cu un otro caso, esta di e dos criaturanan cu a wordo mata pa nan padrastro aña pasa.  Hopi biaha, comunidad no ta al tanto di kico ta sosodiendo. Esey a pone cu hopi cos a cambia, pa e por a haya oido.

E ta sinti cu despues di e caso hororoso di e dos muchanan, e caso di su yiunan a haya un impulso!  Pues nan a haya oido. E ta agradicido di cu su lucha por a yega asina leu.

Solognier no por a bisa nada malo di e mama di su yiunan, pero pe loke ta mas importante, ta e derecho y bienestar di e muchanan.

Tabata tin cosnan cu tabata sosodiendo, unda cu e yiunan tabata conta cierto cosnan cu tabata pasando. Den su caso, e tambe tabatin e custodia tambe di su yiunan. Pero e leynan di Aruba tabata sigui duna preferencia na e mama.  E ta haya cu den leynan na Aruba, cierto aspectonan tin di worde cambia riba e isla.

E ta sugeri pa cuminza cambio di leynan, manera cu nan ta aworaki, e no ta yuda preveni abuso. Pero mas bien, nan ta tolera abuso.

Leynan di Aruba ta comosifuera nan a wordo diseña pa djis yuda ora cu baca hoga. E ta agradicido toch, cu na ultimo Voogdijraad a yud’e den su lucha. Pero leynan y mentalidad mester cambia. Na Aruba un ta gusta tapa pa otro. Pero na tur pais tin esey, y mester pone leynan na luga, cu ta zorg pa e derecho di e mucha ta na prome luga ariba tur otro derecho. Riba derecho di mama, tata, welonan.

E moda di pensa cu mama tin tur derecho, ta un stigma, cu mester cambia. Esey ta un di e problemanan cu tin na Aruba, e mentalidad cu automaticamente, kico cu pasa, e muchanan mester ta cerca e mama. Pero no tur ora esaki ta na bienestar di e mucha.

Tur hende tin nan pensamento y nan opinion, pero na final di dia, e mama cu e tata di e mucha ta esunnan responsabel. Nan tin e obligacion pa duna cuenta y e bienestar na e mucha. Ora cu e mayornan separa, e mayor mester cana su caminda, cual el a haci tambe. No tin lucha sin sacrificio.

 

- Advertisement -

DUNA COMENTARIO

Please enter your comment!
Please enter your name here