Home General Diasabra otro siman lo tin Nobena y Dia di Oracion na Aruba

Diasabra otro siman lo tin Nobena y Dia di Oracion na Aruba

37
0
SHARE
- Advertisement -

ORANJESTAD (AAN): Tur aña ta tuma lugar na diferente parti di mundo un Dia di Oracion na honor di e Señora di tur Pueblo. E dianan mariano aki tin nan origen den e aparicionnan di Mama Maria na Amsterdam  den añanan di 1945 pa 1959.

E aña aki un bes mas Aruba ta presenta un Dia di Oracion na honor di e Señora di tur Pueblo. E Dia di Oracion aki ta worde teni na misa Inmaculada Concepcion na Santa Cruz riba dia di fiesta di nacemento di Birgen Maria, esta diasabra 8 di september cuminsando pa 10or di mainta y lo termina cu un Santo Sacrificio di Misa concelebra pa 7or di anochi.

En conexion cu e Dia di Oracion aki, lo tin un nobena na honor di e Señora di tur Pueblo, cu adoracion di Santisimo Sacramento y lo termina cu un Santo Sacrificio di Misa. E nobena  ta cuminsa diahuebs 30 di augustus y ta termina diabierna 7 di september.

Pater Canisius, sacerdote Hulandes, actualmente estableci na Roma; ta encarga cu e meta pa promove mundialmente  e devocion na e Señora di tur Pueblo, lo ta na Aruba pa presidi e dianan di nobena y participa activamente den e Dia di Oracion.

Durante su aparicion na Ida Peerdeman na Amsterdam, e Señora di tur Pueblo a enfatisa pa duna tur pueblo y nacion un oracion y un imagen.

E Señora di tur Pueblo a dicta un oracion cortico y poderoso pa preserva nos di degeneracion, desaster y guera. “Boso, pueblonan di e tempo aki, sa cu boso ta bou di proteccion di e Señora di tur Pueblo. Invoc’e como boso Abogado, pidi’e pa desvia tur desaster. Pidi’e pa deporta e degeneracion for di e mundo aki. Ta for di degeneracion ta bini desaster. Ta for di degeneracion ta bini guera. Pa medio di mi oracion boso lo pidi pa desvia esaki for di mundo. Boso no sa con grandi y con importante e oracion aki ta cerca Dios.” (mensahe di dia 31 di mei 1955)

Maria ta pidi pa resa e oracion aki por lo menos un bes pa dia. “Mi ta sigura boso cu e mundo lo cambia”. (29 di april 1951) Como Mama di tur Pueblo el a worde manda door di Tata y Yiu pa trece union y paz na mundo, pasobra: “bou di e titulo aki y pa medio di e oracion aki e por salba mundo di un catastrofe mundial grandi”. (10 di mei 1953) Pesey e Señora di tur Pueblo ta pidi cu enfasis pa un accion mundial grandi, pa asina plama su debocion, su oracion y su imagen.

Den e dianan di nobena y Dia di Oracion na Aruba, nos tambe lo resa e oracion aki dilanti di su imagen.

Pueblo di Aruba ta keda cordialmente invita pa  bini hunto y participa cu devocion na cada dia di e nobena, den e parokianan concerni.  Ban honra e Señora di tur Pueblo pa e intercede pa nos y protega nos di degeneracion, desaster y guera. Di e manera aki tambe nos admiracion y aprecio pa Mama Maria lo sigui crece mas atraves di e Señora di tur Pueblo.

 

 

- Advertisement -

DUNA COMENTARIO

Please enter your comment!
Please enter your name here