Home General DOS AÑA DESPUES: Cadaver haya den mondi patras di warda na Shaba...

DOS AÑA DESPUES: Cadaver haya den mondi patras di warda na Shaba ta di Mario Dijkhoff

8610
0
SHARE
- Advertisement -

ORANJESTAD (AAN): Un misterio di casi 8 aña, a keda soluciona Diahuebs na Aruba!  E restonan mortal cu na 2016 a wordo haya den mondi patras di Warda di Polis na Shaba, a resulta di ta e conocido “Mai Cowboy” di Catiri.

Tabata riba un Diadomingo 9 di November, na aña 2009 cu famianan di Mario Dijkhoff a presenta na DIARIO pa suplica pueblo yuda nan localize.  E no a wordo mira mas, despues cu el a cumpra un botter di Longneck na un Rumshop na Tanki Leendert, y envez di cana bay pariba sumbo su cas na Catiri 19, el a cana bay pabao.  E no a wordo mira mas.

Ora cu el a bandona cas, e tabata bisti cu Short color blauw, flanel berde-scur, y cu slof color berde na pia.  Mario tabatin 68 aña di edad, y tabatin estatura di 1.74 meter, cu postura delega, color di cabey shinishi, y e tin barba largo color blanco.

Mario tabata conoci den bario di Catiri y Tanki Leendert como “Mai” of “Mai Cowboy”.  E buskeda e tempo ey a produci ningun resultado.

Añanan a pasa, y ningun novedad mas a presenta.  Ningun hende a mira Mai.

Sinembargo riba un Diamars 14 di Juni 2016, algun persona canando den e pida mondi patras di Warda di Polis na Shaba tabata enbusca di Dadel.  Diripiente nan a bin topa cu varios weso banda di otro, bao di algun mata.  Mesora nan a yama Polis alrededor di 12’or di merdia.

Polis di biaha a drenta accion hunto cu e hefe di Shaba pa asina wak pariba di Warda di Polis na Shaba, pa check kico tin di berdad, y berdad durante un canamento autoridad a haya resto humano den e mondi.

Nan a cera e area pa investigacion, fiscal di Ministerio Publico tambe a presenta na e lugar. Departamento Forensico BFTO a presenta pa asina haci nan investigacion necesario.

For di prome momento caba tabatin e sospecho cu e wesonan aki ta di Mario Dijkhoff, como cu e tin pida hero na su weso di pia.  Tambe e cabez tabatin algo manera e kaak ta di banda.  Eseynan ta algo cu semper Mario a sufri di dje.

Sinembargo a dicidi pa sella tur e wesonan aki, apart den diferente caha, y a manda nan pa Hulanda pa haci investigacion forensico, y tambe di DNA.

Ciencia a yuda determina desde cuanto tempo e cadaver ta eybao, y mucho mas.

El a dura mas di 2 aña, pero riba Diahuebs 30 di Augustus, famianan a wordo avisa cu e restonan mortal haya pariba di Shaba, enberdad ta di Mario Dijkhoff naci dia 7 di Mei 1941.

Como cu ta weso so a haya, e causa di morto no ta conoci.

DIARIO a compronde cu ya caba e restonan mortal a wordo entrega na famia, y el a ser pasa pa Aurora Funeral Home, pa asina cuminza cu e proceso di entiero.  E entiero ta kizas casi 8 aña laat, pero pa e famia e nifica un solucion pa nan preocupacion.

Mario Dijkhoff ta laga atras un yiu muher.  Awor ta den proceso pa check e.o. via Pensioenfonds pa mira con ta cubri e gasto di entiero.

Na famia di e fayecido, DIARIO ta extende su mas profundo palabra di condolencia.

 

- Advertisement -

DUNA COMENTARIO

Please enter your comment!
Please enter your name here