Home Deporte E prome siman di September tur e deportenan cu ta participa den...

E prome siman di September tur e deportenan cu ta participa den Jani Brokke Memorial ta start sali

31
0
SHARE
- Advertisement -

ORANJESTAD (AAN) – Manera tur aña  Directiva di  Fundacion Movemiento ta Bida (FMTB) ta organisa e torneo deportivo pa tur esnan cu tin 60 aña of mas. E aña aki FMTB a haya ayudo financiero di parti Samen Werkende Fondsen Caribisch Deel (SFC ) y tambe Minister di Deporte pa cual nan ta sumamente agradicido. Na e manera aki 60 plusnan por tin un evento deportivo grandi atrobe.

E promer siman di September tur e deportenan cu ta partisipa den Jani Brokke memorial ta start sali. Un total di ocho ramo di deporte lo worde practica durante e dianan ei y entregamento di premio e aña aki lo ta dia 15 di september durante un anochi ameno  di 8 pm pa 12 am unda tur hende por los pia cu bon musica manera semper di “On Track”. Esaki lo tuma lugar na Club Cage den King Plaza ariba Sasaki.

Softbal ta cuminsa un tiki mas tempran ariba 26 di Augustus  ariba e tereno di Pos Chiquito y lo termina dia 2 di september y mescos cu aña pasa lo tin bataya fuerte entre e teamnan partisipante. Weganan ta cuminsa pa 10’or di mainta.

Volleyball ainda tin lugar pa tur esnan cu kier hunga cu of sin team. Volleyball lo worde hunga den Sporthal na Santa Cruz diahuebs 13 di september pa 7’or di anochi.Tuma contacto cu Rudy Leysner na tel:  5942546.

Atletismo lo tuma lugar dia 1 di September y lo cuminsa pa 6.30 mainta ariba linear park y por cana 3 of 5 km. Por inscribi na oficina di FMTB na IBISA ariba dianan 27,28,29,30 y 31 di augustus.

E aña aki tin un cambio den biljard ya cu anja pasa nan amigo Jose Geerman a bai laga nan, a disidi pa hunga e torneo aki na su nomber . E aña aki e lo worde hunga na San Nicolas na cas di Sr. Everon . Dianan 1 , 2  y 8, 9 di September  lo worde hunga cuminsando pa 3’or. Si abo tambe kier partisipa ainda cu biljard anto jama Sr Everon  na tel: 5674154

Pa bowling manera tur aña Edna Maduro lo bai organisa esaki y lo worde hunga ariba canchanan di Eagle Bowling.  E weganan lo tuma lugar dianan 7 y 10 di September .Si abo kier purba bo suerte cu e caballeronan y damanan 60 den bowling anto jama Edna na tel 5942433

Domino ta completamente jen caba ja cu Roy Sneek for di Maart caba a cuminsa prepara su schedule cu e aña aki atrobe lo ta na Centro di Bario Noord. Dia 28 di Augustus e reunion di domino na Centro di Bario Noord a tuma lugar pa 7.30 anochi. Amigo Roy ta puntra tur hungador pa ta presente 30 minuut promer cu wega y tene cuenta co lo worde hunga dianan 7 y 9 di September. Pa mas informacion tocante e differente weganan por jama oficina di FMTB na tel: 5868651.

Tennis e anja aki lo tuma lugar ariba e canchanan di Gold Coast ariba dianan 4,5 y 6 di september cuminsanda pa 7’or di anochi. Esnan cu kier partisipa por tuma contacto cu Ceasar na tel 7409167 of pasa serca dje na canchanan di Gold Coast parti atardi.

Bo no mester tin partner ja cu Ceasar mes ta traha tur e teamnan.

Directiva di Fundacion Movemiento ta Bida kier a gradisi e anja aki atrobe tur esnan cu ta juda nos gratuitamente pa organisa e torneo grandi aki cu ta esun di mas grandi na Aruba. Tur hende ta worde invita di awor caba pa bin presencia nos 60 plusnan den accion.

Harold de Miranda

Oranjestad 19 di augustus 2018

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Fundacion Movemento ta Bida

Secretariaat: Frankrijkstraat #1, Oranjestad.  Tel: 5868651 / 5942546

e-mail : movemientotabida@gmail.com

Account Nr : CMB 60743509  K.v.k Nr : S1107   p.n: 5030707

- Advertisement -

DUNA COMENTARIO

Please enter your comment!
Please enter your name here