Home Hudicial Empleado di Gobierno condena pa posesion di arma, kita for di trabou

Empleado di Gobierno condena pa posesion di arma, kita for di trabou

586
0
SHARE
- Advertisement -

ORANJESTAD (AAN) – Un empleado di Gobierno, despues di a wordo condena pa posesion di un arma di candela y a haya castigo di prison, a haya castigo disciplinario caminda el a wordo kita for di trabou. E persona masculino a dicidi di cuminsa un caso contra Gobernador, kende a firma e decreto pa e retiro.

E tipo di casonan aki ta “Landsverordening ambtenarenrechtspraak” (La). Ta asina cu segun ley di ambtenaar (Lma) ora un persona haya castigo di prison, por tuma medida disciplinario contra dje y un di e medidanan ta retiro.

RETIRO

E decreto di retiro ta di dia 20 Maart 2018, caminda Su Excelencia Gobernador, haciendo uso di articulo 98, di Landsverordening material ambtenarenrecht (Lma), a kita e persona, un empleado di DOW, for di trabou.

E persona a protesta contra e decreto aki dia 17 di April y dia 26 di April 2018 el a cuminsa un caso. E persona a pidi Hues pa tuma e decision cu e lo sigui haya su salario y traha como empleado di Gobierno te ora cu e instancia mas halto a tuma un decision riba su protesta.

Tratamento di e caso tabata na Juni 2018 den raadkamer y recien sentencia a cay.

EVALUACION DI HUES

Hues a mustra cu segun articulo 94 di La, un empleado di Gobierno por cuminsa un caso pa pidi un decision di Hues relaciona cu e decreto cu el a haya.

Hues a mustra cu segun articulo 82 di Lma, un ambtenaar cu haya castigo pa un caso penal lo por spera di haya medida disciplinario. Articulo 83 di Lma ta mustra cu un di e castigonan disciplinario ta retiro.

Articulo 98 di Lma ta bisa cu un ambtenaar por wordo kita ora e haya castigo di prison.

RETIRO TA NA SU LUGAR

Hues ta mustra cu e persona ta traha como supervisor na DOW y door cu dia 18 Januari 2018 a wordo condena pa posesion di arma di candela, el a haya retiro. E persona a wordo condena na 15 luna di prison di cual 5 luna ta condicional.

Na opinion di Hues e hecho pa cual e persona a wordo condena por wordo cualifica como un hecho hopi serio. Hues ta mustra cu por pone exigencianan halto pa un ambtenaar pa loke ta integridad y confianza pa cu ehercemento di su trabou.

Hues ta haya cu Gobernador cu bon base a tuma e punto di bista cu e persona door di su actuacion, a crea desconfianza. Teniendo na cuenta e castigo penal contra e personal y pa un hecho hopi serio, Gobernador por a tuma e decision di retiro.

Hues ta di opinion cu e puntonan cu e persona a trece padilanti esta cu Gobernador ta actua contra diferente principionan, no ta pisa asina hopi pa bisa cu e decision di retiro tabata un sancion mucho pisa.

DECISION

Hues su decision ta cu e ta rechaza e peticion di e persona.

 

- Advertisement -

DUNA COMENTARIO

Please enter your comment!
Please enter your name here