Home Hudicial Fiscal a exigi 1 aña y 8 luna pa Venezolano cu tabata...

Fiscal a exigi 1 aña y 8 luna pa Venezolano cu tabata prepara atraco

141
0
SHARE
- Advertisement -

ORANJESTAD (AAN): Aunke cu e Venezolano A.M.G. ta para riba cu e no sa nada di atraco y tampoco arma di candela, Fiscal ta hay’e culpable y a exigi 1 aña y 8 luna di prison.

E acusacion cu Fiscal a presenta contra A.M.G. ta cu riba 16 Januari 2018 el a prepara un atraco y tabata den posesion di un arma di candela.

   PURBA HORTA DOS BIAHA:

Segun A.M.G. el a wordo yama 15 Januari 2018 pa duna un persona J. y un otro lift. Durante cu e tabata cu nan, e persona J. a bis’e cu e kier horta for di un cas y a pidi A.M.G. lag’e na e cas y despues J. a yam’e pa bay busk’e. Segun A.M.G. e doñonan di e cas no tabata tey. A.M.G. a bisa Hues cu ningun momento el a mira J. cu arma y no tabatin combersacion tocante un arma. El a bisa cu su siguiente dia 16 Januari 2018 el a wordo deteni. El a bisa cu desde Juni 2017 e ta kedando ilegal na Aruba.

A.M.G. a bisa cu ora J. a yam’e el a puntra si ya nan a drenta, J. a bisa cu tabatin hende rond di e cas. El a bay busk’e y hiba cas. Su siguiente dia J. a yam’e pa ofrece desayuno y cu e tabatin un otro lugar pa haci ladronicia. J. tabata kier horta for di autonan di turista cu ta bay huur brommer.

E tabata warda ora turistanan drenta den oficina pa regla huur, pa e ora ey bay horta for di auto. Segun A.M.G. e mester a busca J. despues pero e no a hay’e. E dia ey tampoco el a mira arma di candela y tampoco J. a papia cun’e riba arma di candela. J. a yam’e pa bolbe busk’e pasobra tin hopi hende y no tabata sa cual auto horta. E ora ey A.M.G. a dicidi cu lo no bay haci nada mas y a bay busca J.

Hues a remarca cu J. a declara cu ta A.M.G. kier a bay horta y cu A.M.G. a tuma contacto cun’e. A.M.G. a desmenti esey. El a bisa cu e tabata core auto. Hues a remarca cu el a scucha A.M.G. bisa cu a dicidi di no lo bay horta y esey ta mustra cu e tabata tuma decision. El a bisa Hues cu el a dicidi pa stop pasobra e tabata gasta gasoline. J. a pidi pa bay su cas un rato pa e bebe awa. El a pasa eynan y J. a tarda un rato y bolbe. A.M.G. ta sospecha cu esey tabata e momento cu J. lo a coy e arma.

    NAN A TAP TELEFON:

Hues a bisa cu a scucha yamadanan entre J. y A.M.G. Hues a mustra cu a scucha A.M.G. ta puntra si a drenta e cas. Despues tabatin combersacion entre J. y A.M.G. tocante e turistanan. A.M.G. tabata bisa J. cu el a mira un grupo di Mericano y J. a bisa cu e trahadornan di lugar tin bista riba nan.

A.M.G. a puntra si J. por core bay riba nan y wak si tin un cadena di oro. J. a bisa cu e no ta mira joyas. Hues a remarca cu for di e combesacionnan aki por conclui cu A.M.G. tabata hunto cu J. con pa horta e Americanonan.

   CORE PA POLIS:

Na dado momento Polis a bay busca A.M.G. y J. pasobra sospecha cu lo bay haci algo malo. A.M.G. tabata para pafor y ora el a mira Polis el a core bay. El a bisa Hues cu e tabata ilegal y tabata traha pa mantene su famia na Venezuela. Polis a core su tras y detene. Polis a mustra cu a mira A.M.G. ta papia na cellular y algo bou flanel na su huep – barica. Despues cu a detene A.M.G., e no tabatin nada.

Durante cu el a core bay, el a drenta mondi. Hues tabata kier sa si e tabatin algo mas. J. ta desmenti cu e tabatin un arma. El a splica cu e tabata bin Aruba diferente biaha pa bende cabaron y pisca cu restaurantnan pero desde cu a sera e frontera, el a keda sin trabou y a huur un auto y tabata transporta hende manera taxi pero ilegal.

EXIGENCIA DI FISCAL:

Fiscal a bisa Hues for di investigacion ta mustra cla cu A.M.G. hunto cu J. tabata preparando pa haci atraco arma. Polis a actua na tempo pa evita cu lo a haci un atraco arma. A scucha yamadanan y por a ripara cu nan tabata vigila turistanan pa haci atraco.

For di combersacionnan por conclui cu A.M.G. no tabata fungi manera taxi ilegal sino tabata duna instruccionnan na J. pa horta turistanan. No ta importante for di unda e arma a sali y ken ta donjo di e arma. E intension tabata pa horta turistanan. Ta un asunto hopi serio. Fiscal a exigi 1 aña y 8 luna di prison.

   ABOGADO:

Abogado mr. Carlo a bisa Hues cu Fiscal mester demostra cu A.M.G. ta culpable. E ta haya cu no tin suficiente prueba pa condena A.M.G. pa prepara atraco. No a haya A.M.G. cu arma sino cu J. a wordo haya cu arma.

E abogado ta haya cu mester declara A.M.G. liber. Ningun caminda por prueba cu A.M.G. a forza hende of a duna instruccion pa haci atraco. Tabatin combersacion entre J. y un otro persona desconoci tocante un arma di candela. A.M.G. no tabata envolvi den e combersacion aki. For di investigacion no por saca afor cu a haya arma den auto di A.M.G., na banda of bou di asiento.

Na opinion di mr. Carlo, no tin ningun prueba cu tabatin preparacion y cu A.M.G. tabatin arma. Ta solamente tin e declaracion di J. contra A.M.G. caminda e ta tira culpa riba A.M.G. El a conclui pa declara A.M.G. liber.

Hues a sera tratamento di e caso y a bisa cu dia 14 September 2018 lo tin sentencia.

 

- Advertisement -

DUNA COMENTARIO

Please enter your comment!
Please enter your name here