Home Hudicial Fiscal ta pidi Hues pa declara persona liber

Fiscal ta pidi Hues pa declara persona liber

219
0
SHARE
- Advertisement -

Mientras cu Polis ta duna boet di 300 florin

ORANJESTAD (AAN):  Polis a duna un dama un boet di 300 florin pasobra e dama tabatin un adorno poni dilanti e number di auto. E tabatin manera un plastic color un poco scur. Polis ta acusa e dama di intencionalmente a pone esaki y cu esaki ta contra ley. Den Corte e dama a cuestiona con Polis a trat’e manera un criminal. Fiscal a pidi Hues pa declara e dama liber pasobra no por prueba cu intencionalmente e dama a pone esaki. Hues a declara e dama liber.

DAMA TA CUESTIONA TRATO DI POLIS

E dama no tabata di acuerdo cu e boet y warda ora e mester presenta dilanti Hues. E dama a bisa Hues cu el a keda sin paga e boet pasobra e no ta di acuerdo cu e forma con el a wordo trata y tampoco cu e ta haya un boet di 300 florin pa algo cu e no a haci intencional, manera Polis ta acus’e di dje.

E dama, den un forma basta emociona, a splica Hues con agente di Polis a grit’e y trat’e manera cu e ta un criminal. E dama no ta haya cu esey ta e forma corecto pa a trat’e pasobra e no a haci nada contra ley. E dama a bisa Hues cu ora e agente di Polis a puntr’e pakico e tin e plastic poni, el a bisa cu el a pone como un adorno na su auto.

FISCAL A PIDI PA DECLARA E DAMA LIBER

Fiscal a bisa Hues cu e no ta haya legalmente proba cu intencionalmente e dama a pone e plastic manera Polis ta acus’e. El a pidi Hues pa declara e dama liber.

NO POR PONE PLASTIC DILANTI NUMBER

Hues a sera tratamento di e caso y a dicta sentencia di biaha. Hues a bisa e dama cu Polis tin e autoridad pa controla. Hues a bisa cu segun ley, no por pone nada dilanti plachi di number. Esaki por dificulta Polis pa mira e plachi di number di auto.

Pa loke ta e boet di 300 florin, Hues a bay di acuerdo cu e peticion di Fiscal y a declara e dama liber. Esey ta nifica cu e dama no mester paga boet.

Ta asina cu hopi chofer ta cumpra e plastic aki como un adorno na lugarnan cu ta bende esaki, siendo cu segun ley ta prohibi pa tin un plastic dilanti e number. Esaki pasobra despues di tempo e plastic aki ta bira dof y no por mira e number.

 

- Advertisement -

DUNA COMENTARIO

Please enter your comment!
Please enter your name here