Home Gobierno Gobierno cu speranza y cautela riba fase 2 y 3 di CITGO

Gobierno cu speranza y cautela riba fase 2 y 3 di CITGO

121
0
SHARE
- Advertisement -

Minister presidente:

ORANJESTAD (AAN) — Minister Presidente, sra. Evelyn Wever- Croes, den conferencia di prensa, a duna un update tocante e desaroyonan di refineria CITGO.

E siman aki, e dignatario a splica, gobierno a sinta cu ehecutivonan local di e refineria, tocante e asunto aki.

Manera ta conoci gobierno a manda yama e ehecutivonan di e compania CITGO na Merca, pa un reunion otro siman. Ainda no a confirma e fecha y nan a confirma cu nan a ricibi e carta, y a pidi pa amplia e delegacion cu e Presidente di PDVSA, pero no a haya confirmacion si e reunion por tuma lugar otro siman, diahuebs 23 manera gobierno a propone.

Si ta asina cu e directie local cu a pidi gobierno un reunion, a duna e noticia cu nan ta bay move pa fase 2.

“Fase 1 a keda cla na Mei, y aworaki a logra acumula e fondonan pa fase 2 y ainda falta fase 3 cu ta esun mas grandi y mas importante, na unda un inversion grandisimo ta aden” e dignatario a subraya.

Fase 2 ta uno cu nan ta yama fase di inspeccion y di calculacion. “Den e fase aki nan tin un fondo disponible di 35 miyon dollar. E fondonan aki mi a puntra nan si ta cay bao di embargo y nan a bisa cu no pasobra ta un fondo cu nan a logra internamente, den un transaccion na Venezuela. Kiermen, no ta fondonan cu mester sali di Merca bay Venezuela, y e fase aki ta planifica pa dura entre ocho pa diez luna, den cual no ta rehabilitacion ta bay tuma lugar, sino inspeccion cu calculacion cu por genera cupo di empleo te un maximo di 500 persona pero den fase 2 ta 150 hende extra”, e mandatario a duna di conoce.

E mandatario a wordo informa cu nan tin 390 persona ta trahando.

Gobierno a tuma e noticia aki cu escepticismo pasobra nan a yega di scucha esaki mas biaha, y nan kier mira cosnan wordo concretiza. No obstante, nan a mustra hopi serio den esaki y gobierno ta sigur cu esaki no ta trampa, manera tin hende ta pensa.

“Si tin un inversionista bo dilanti cu ta bisa bo cu e siguiente ocho pa diez lunanan e por inverti 35 miyon florin y por duna trabao na 150 hende mas, kere mi nos ta tume cu dos man; cu man habri manera nos ta bisa”, Minister Presidente a expresa.

“Esey ta e actitud cu gobierno tin den e caso aki. Cualkier di e inversionnan aki ta bay genera empleo, desaroyo economico no manera gobierno kier of e contrato a premira, pero e ta bay ta algo”, Prome Minister a indica.

El a agrega cu gobierno a tuma esaki cu un tono positivo, mas yen di aliento y cu ta trece manera un tipo di alivio.

Gobierno a haci varios pregunta entre otro, ki dia e fase 2 ta cuminza. Esaki ta 1 di September y lo dura di ocho pa diez luna. Esaki kiermen, cu mester por keda cla entre fin di April pa fin di Juni.

Tambe el a puntra con ta para cu fase 3. Como cu den e fase aki tin asina tanto fondo, no ta sigur cu nan tine ainda. E mandatario a bisa cu podise cu e magnitud di e fondo aki su financiamento nan por tin problema cu Merca, etc.

Pero aworaki nan a indica na Gobierno cu fase 2 ta cuminza 1 di September.

Prome Minister a menciona tambe cu Minister di Labor tabata presente den e reunion aki cu Directie local, pasobra aworaki ta e fase unda e mester garantiza cu di e 150 personanan extra cu ta bin traha, nos hendenan local ta haya prioridad.

E dignatario a reitera cu gobierno ta hopi cauteloso den esaki. Nan no ta di hubilo ni fiesta pero lo haci control dia 1 di September y ta keda monitor e desaroyonan aki.

Otro siman cu e demas ehecutivonan lo ta na Aruba, e mandatario a subraya, e tin speranza di haya mas informacion encuanto con ta bay sigui despues cu e fase 2.

- Advertisement -

DUNA COMENTARIO

Please enter your comment!
Please enter your name here