Home Gobierno Gobierno di Aruba no ta den posicion pa para garantia pa prestamo...

Gobierno di Aruba no ta den posicion pa para garantia pa prestamo ni fianza

48
0
SHARE
- Advertisement -

Relaciona cu proyecto di ampliacion di aeropuerto

ORANJESTAD  (AAN):  Manera por lesa den otro noticia awe, e proyecto di ampliacion di aeropuerto “Gateway” 2030 ta para y cu ta aeropuerto mes a dicidi di haci esaki te ora tin claridad riba e tema importante aki. 

Gobierno no tin espacio pa para garantia

Aunke banconan no a inclui e condicion cu Schiphol Group mester para garantia pa e prestamo, e hecho cu nan ta sugeri pa nan keda mientras e proyecto ta andando ta duna suficiente indicacion di e direccion cu nan ta bay.

Gobierno di Aruba di otro banda no ta den posicion awor aki pa para garantia tampoco pa un fiansa di 275 miyon dollar, pasobra esey lo bay riba nos balans di debe, cu tur consecuencia cu e lo bin cune pa cu e reglanan acorda cu CAFT. 

Relacion di Schiphol Group y Gobierno di Aruba

Pa casualidad, Schiphol Group a bini Aruba bou maneho di Minister Eddie Briesen di MEP na aña 2003 mas o menos. E tempo ey, apenas a asumi poder na final di 2001, a bin hereda un Aeropuerto cu 128 miyon na debe na bondholders y 21 miyon na debenan vigente.

Cu bondholders cla pa tuma accion, Minister Eddie Briesen e tempo ey a combersa cu Erwin Croes di KPMG cu tabatin experencia di Schiphol Group na Hulanda pa habri negociacionnan.

A yega na un acuerdo pa algun aña, pa nan prepara un Arubiano pa sigui despues di 5 aña. Sinembargo, Schiphol Group a yuda saca AAA di tur nan debenan den apenas 3 aña di tempo, pero te awe nunca a haci suficiente pa tin un ehecutivo local cla pa tuma e compania over.

Na luna di mei 2015 Minister Otmar Oduber a renoba e contract pa 5 aña mas bayendo atras retroactivo. Esey ta vence awor na September 2019. 

Opinion mixto den Conseho di Minister

No tin unanimidad den e decision cu si ta sigui cu Schiphol Group of no. E Minister cu mester tuma e decision ta Dangui Oduber, pero e ultimo palabra ta den Conseho di Minister como “Aandeelhouder” di e compania.

Ey tin Minister cu ta prefera pa Gobierno mes tuma maneho di e compania over, mientras cu otronan ta puntra si no tin mas compania cu por opera e Aeropuerto pero cu miho condicionnan.

Tin di e Ministernan ta sinti cu Schiphol Group deliberadamente ta añadi den tur contract cu ta prepara un Arubiano pa maneha e compania pero no ta cumpli. Tambe a acorda cu pa aña 2020 mester ta maneha 3 miyon pasahero pa despues sigui pa 5 miyon pasahero, loke no ta pasando ainda. 

Asina vakantie caba mester bolbe na realidad

Mientras cu dianan ta pasa, e tardamento den ehecuta plannan pa ampliacion di nos Aeropuerto lo cuminsa mustra su consecuencianan. Entrante dia 1 di juli a aumenta Airport Tax cu 40% precisamente pa cubri e proyecto aki, pues si no ta ehecute, lo mester baha e impuesto bek.

No ehecucion lo stroba plannan di ampliacion di buelonan tambe, cu lo haci dificil pa alcansa e 5 miyon pasaheronan cu nos ta anhela. Pero ta parce cu tur cos ta contecta na otro: Si no firma cu Schiphol Group bou di su condicionnan y terminonan, lo NO tin fiansa. Si no tin fiansa, NO por sigui cu e proyecto di Gateway 2030.

Y si no amplia nos facilidadnan, tur e proyecto pa e parti Americano, cu maletanan y mas opcion pa US CBP Pre Clearance ta cay na awa.

 

 

- Advertisement -

DUNA COMENTARIO

Please enter your comment!
Please enter your name here