Endy Croes:
ORANJESTAD (AAN): Ora cu partido AVP a drenta den gobernacion, Mike de Meza a priminti cu lo no mishi cu placanan di dividendo di companianan estatal, pero nan a hasie toch.
Esaki segun parlamentario di MEP Endy Croes, durante nan conferencia di prensa di tur Dialuna.
El a indica tambe cu de Meza te hasta tabata acusa gabinete di Nel Oduber cu nan si tabata uza placa di dividendo di e companianan estatal.
Croes a presenta un documento riba cual por wak cuanto dividendo gobierno di AVP a uza durante nan gobernacion.
Segun e parlamentario, AVP a uza entre otro 68 miyon florin di Setar N.V, 36 miyon di Banco Central, 60 miyon di Triple A., 20 miyon di ATA, 6 miyon di Utilities y 12 miyon florin di RDA, pa un total di mas di 200 miyon florin.
“Mi kier trece esaki dilanti, pa mustra cu ora cu de Meza papia y bo mira e realidad di su maneho, locual e ta bisa y locual e ta hasi ta completamente otro”, segun Croes, kende a indica cu pa tur cos de Meza lo tabata tin un solucion, pero nunca e solucion a presenta.
“Mike de Meza ta un manipulador y mentiroso y mi kier pa bosonan huzge pa su actonan”, segun Croes.
