Home Parlamento Gobierno no tin plan di maneho y aumento di awa y coriente...

Gobierno no tin plan di maneho y aumento di awa y coriente ta resultado di esaki

37
0
SHARE
- Advertisement -

Parlamentario Mike de Meza

ORANJESTAD (AAN): Parlamentario Mike de Meza a mustra cu den diferente medio di comunicacion a sali publica  algo cu fraccion di AVP  a bin ta bisa na diferente ocasion caba, esta cu WEB Aruba NV a pidi Gobierno pa aumenta prijs di awa cu coriente, unda cu awa lo mester aumenta cu mas o menos 10% y coriente cu mas o menos 20%.

Esaki ta algo sumamente grave, Parlamentario de Meza a declara y mustrando cu ya caba  for di prome di juli tin e medidanan cu a haci nan entrada na Aruba, cu ta e aumento di e BBO for di 3.5 pa 6% cu sigur tin un impacto hopi grandi riba e bida socio economico na Aruba.

Cu e impacto di e aumento di BBO  a mira su efectonan caba pero den e lunanan nos dilanti, tur hende ta bay mira con dramatico realmente e decision di e Gobierno aki cu e medida di aumento di BBO.

“Bo por a mira e efecto aki caba riba e prijs di gasolin, diesel, kerosin, tur a aumenta. Nos a bay haci un evaluacion for di cabamento di aña pa aworaki,  di kico e aumento total tabata.

E ta banda di 25 cent riba e prijs di e combustibel y nos sa cu ainda falta e aña’ki un aumento di 8 cent cu ta parti di e pakete di medidanan cu Gobierno tin, esta e ‘coalitieheffing’ (crisisheffing) pa cu e accijns mester a worde aumenta cu 10 cen, cu ta duna Gobierno entre 12 pa 15 miyon Florin caminda 2 cen so a worde aumenta, pues falta e aumento di 8 cent ainda riba prijs di combustibelnan.

Esaki ta sin tuma e efectonan riba aumento di prijs ora cu esaki tuma luga riba mercado internaciona, pues pa fin di aña, si mira  e trendnan cu ta bay, bo por bay mira aumentonan mas dramatico ainda riba e prijs di transporte.

Nos fraccion di AVP pa lunanan caba a laga sa cu Gobierno lo mester anuncia y bin c‘un maneho specifico riba e parti energetico pasobra nos por a tuma nota cu na momento cu e Gobierno aki a tuma mando, a tuma decision pa stop por ehempel e mesun ‘hedging’ cu semper nan a cuestiona.

Den 2 luna di tempo e mesun Gobierno a duna instruccion pa bay hedge atrobe y despues di tres luna a tuma decision atrobe pa stop e hedging.

Un di e efectonan cu na momento cu nan a para e hedging tabata locual nos ta mira aworaki, cu e efecto di 10 pa 20% di aumento di awa y coriente y ainda nos no ta papia di e aumento cu lo worde poni acerca na momento cu bo bay cumpra un fuel oil di mas calidad pa worde uza na WEB pa preveni, den nan bista, e efecto di emision cu ta stroba e operacion na APA,” Parlamentario Mike de Meza a declara.

De Meza a sigui mustra cu por a scucha Prome Minister bisa cu e no ta compronde y kier sa ken ta responsabel pa traha e waf eynan y no a haci un analisis.

“Lagami ta enfatico riba esaki. E mudamento di containerhaven di Playa pa Barcadera ta un proyecto cu ta existi pa 30 aña caba y a pasa door di diferente Gobiernonan. Nos ta corda e Gobierno di Gabinete Oduber 3 y 4 for di aña 2001 pa 2009 tabata bezig cu e mesun proyecto aki y cla pa bay ehecuta esaki mas lihe posibel.

Nos ta corda cu nan tabata bezig cu un di e cruiselinenan grandi te cu a bin un discusion di cosnan straño cu a tuma luga y den esaki ta bin den mi mente e nomber Nandar.

Nos tur ta corda kico tur esaki a trece. Nos ta corda tambe cu tabatin tambe un compania di Barcelona cu tabata esun di container cu Gobierno tabata negociando cu nan y a papia hasta di findersfee cu a worde paga.

Na final di dia e propio APA a para contra Gobierno e tempo ey pa e proyecto pasobra no tabata confia esaki. A bin discusion grandi. Tur Gobierno tabata traha riba e proyecto ey. E diferencia ta cu na momento cu nos a drenta den Gobierno nos tabatin un plan total.

Un plan pa muda e containerhaven for di Oranjestad pa Barcadera y gabinete Wever Croes a drenta gobiernos sin plan, a tuma medida sin plan y tur promesa cu nan a haci durante di campaña electoral, nan no tabatin plan pa ehecuta esaki y awe ta pueblo ta bira victima di e incapacidad aki,” Mike de Meza di fraccion di AVP a mustra.

 

- Advertisement -

DUNA COMENTARIO

Please enter your comment!
Please enter your name here