Home Cultura Gran Concierto “Dios ta cu nos” den Cas di Cultura Diasabra 11...

Gran Concierto “Dios ta cu nos” den Cas di Cultura Diasabra 11 di Augustus

74
0
SHARE
- Advertisement -

Eltienne celebrando diez aña cantando Gospel:

ORANJESTAD (AAN) – Matutino DIARIO a entrevista e hoben Eltienne Yarzagaray, relaciona cu su proximo concierto, cu lo tuma lugar den Cas di Cultura, Diasabra 11 di Augustus, di 7.30 te 10 or di anochi, celebrando su di diez aniversario cantando Gospel.

Esaki ta e di diez concierto cu Eltienne ta bay organiza, anto e ta hiba e nomber di “Dios ta cu Nos”. E hoben ta conta nos ken lo acompañe durante e gran Concierto aki.

“ Lo mi wordo acompaña pa artistanan invita, manera Sharon Roos, Miguel Genser, Noush Noush y tambe mi tin presentacion di e hobencita Yetzenia Martinez, ken ta bay canta su mesun composicion ‘Jesus ta semper banda di mi’, tambe Mayra Bennett cu ta bay interpreta un di mi canticanan, y na final mi tin Nico Connor, ken ta toca steel-band y ta hopi conoci na Aruba. E Orkesta United Melodies ta bay acompaña nos riba stage”, Eltienne a duna di conoce.

Eltienne ta kere y tin hopi orguyo di nos artistanan local:

“Mi ta convenci cu nos tin artistanan di un nivel hopi halto, y cu por duna un presentacion riba nivel internacional”, Eltienne a expresa.

Eltienne ta menciona pakico el a scoge e titulo “Dios ta cu nos” pa e concierto aki.

“Mi a scoge e nomber “Dios ta cu nos’ pasobra e ta un pacto cu mi mama a yega di haci cu Dios, ora cu a surgi complicacionnan di embarazo y nos bida tabata na peligro, y el a priminti Dios di duna mi e nomber Eltienne Ruben Emmanuel. Emmanuel kiermen Dios ta cu nos. E momento ey mi mama a haya un vision unda el a wak mi riba un stage grandi. Tambe pasobra mi ta ripara cu den nos pueblo hopi noticia negativo ta circula; cu hopi cos malo ta pasando,  parti di nos hubentud ta bayendo den mal caminda y esey tambe a duna mi un empuhe pa mi por trece un concierto pa recorda tur hende cu Dios ta cu nos”, Eltienne a expresa.

Den e concierto aki Eltienne ta bay canta pa prome biaha en bibo su cancion “Emmanuel” pa clausura e concierto.

“Mirando cu mi ta celebrando diez aña cantando Gospel, mi tin cu bisa cu nan ta diez aña di gozo pero cu tambe a trece su retonan cune. Ora bo tin e talento aki hopi biaha bo tin cu Ministra un hende pasobra nan ta identifica nan mes cu bo cancion y tin biaha tin situacionnan hopi profundo cu hende ta pasa den dje y mi ta hopi contento cu mi por ta un instrumento di Dios, den e momentonan asina. Tambe cu mi por a inspira hopi mucha y hoben pa busca e caminda di Dios. E aspecto aki ta hopi importante, pasobra e parti spiritual ta trece un balansa den e bida di un hoben y haci cu e ta mas sigur di su mes y ta enfoca riba su meta y visionnan. Mi ta kere cu atravez di mi musica hopi hoben a bin encontra nan mes cu nan bida spiritual”, Eltienne a expresa.

Na Aruba nos tin un publico cu ta gusta musica Gospel, no obstante pa loke ta trata artistanan Gospel na Aruba, Eltienne ta lamenta cu poco, poco nan ta cayendo.

“Mi ta kere cu e tin di haber cu e parti di financiamento pasobra pa produci un cantica, un CD y pa haci un concierto tin hopi gasto y hopi biaha bo no ta haya sponsors cu bo tin mester pa realiza esaki. Hopi biaha mi ta haci esaki riba mi propio forza. Si mi no ta hacie Aruba lo no tabata tin un produccion Gospel nacional. Mi ta hopi contento cu e pueblo di Aruba semper a respalda mi, kere den mi metanan, mi soñonan pa mi por sigui realiza mi actividadnan Gospel”.

Eltienne ta un hoben cu semper tey pa tur hende sin distincion di creencia religioso.

“Mi musica no tin un religion mara na dje sino cu tur hende ta bon bini, no ta importa bo denominacion religioso mas si e curazon cu ta pa Señor. Trece union den nos pueblo ta hopi importante pa mi”, Eltienne a expresa.

INVITACION:

Eltienne kier a invita henter nos comunidad pa e Concierto “Dios ta cu nos”. Ainda tin algun carchi disponible cu por adkiri na: Citgo Esso Vill, Citgo Boulevard, Friends of God Bookstore den Caya, y na Dowco Santa Cruz. Prijs ta 35 florin.

“Mi ta invita henter pueblo di Aruba pa bin celebra cu mi e di diez añanan cu mi ta canta Gospel cu hopi entusiasmo, amor y inspiracion”, Eltienne a conclui.

 

- Advertisement -

DUNA COMENTARIO

Please enter your comment!
Please enter your name here