Henter comunidad ta invita pa bisti na preto y bin hunto na Plaza Alameda

    660
    0
    SHARE
    - Advertisement -

    Comision Stop Abuso cu accion awe:

    ORANJESTAD (AAN) –  Marinus Wegereef, ta miembro y vocero di e Comision Stop Abuso, y den entrevista cu Matutino DIARIO, a duna informacion tocante un accion cu nan ta bay tin awe, den cual ta haci un yamada na comunidad pa tur hende bisti na preto.

    Esaki relaciona cu e caso lamentable di un señora di nos comunidad cu a perde su bida, como resultado di abuso domestico.

    Wegereef, como hende homber, ta considera cu un hende cu ta durf di comete abuso domestico, lanta man contra mucha, contra nan casa, ta un cobarde!

    Un persona cu tin problema cu su mes, cu tin problema cu consumo di alcohol, tin cu busca yudanza pasobra un hende normal no ta haci asina.

    Como cu awe e abusador ta wordo presenta dilanti Huez Comisario e Comision ta pidi henter pueblo pa bisti na preto y asina duna support na e accion cu nan kier organiza.

    E Comision kier vocifera tocante e Plan di Crisis cu tin y pidi gobierno pa implementa esaki no awe, sino for di ayera caba!

    Asina Wegereef a subraya, pa gobierno duna e instancianan concerni tur e instrumentonan  cu nan mester pa traha, no solamente den personal pero otro aspectonan tambe, entre otro aumenta e “slachtofferhulp”, unda e tin entendi tin dos hende so.

    Intencion di e comision ta pa lanza un website unda nan ta pidi pueblo pa bin cu sugerencianan constructivo. E Comision no a lanta pa ataca ni ofende pero pa bin cu sugerencianan constructivo pa hunto logra algo positivo.

    Esey a sosode diferente epoca di crisis na Aruba, manera ora Lago a cera na 1985 cu e pais tabata den crisis, pero a traha hunto y a logra recupera.

    Idea ta tambe pa dia 30 di Augustus organiza un evento grandi, nacional, pa cual a pidi permiso caba.

    E evento aki ta pa recausa fondo pa Fundacion Hende Muher den Dificultad. E lo tuma lugar riba Plaza Alameda na unda lo tin un rueda di prensa pa pidi tur artista local pa uni y traha un programa pa concientiza tocante e problema di abuso domestico, cu a sali foi man caba, mientras tanto tin caso tras di caso aden, segun Wegereef.

    Marinus Wegereef a bisa cu enfasis cu hende homber cu lanta man contra hende muher NO TA UN HOMBER! Y a reitera cu esnan cu ta mishi cu hende muher of mucha ta un cobarde. E mester busca ayudo profesional pero abuso no ta e solucion pa resolve un problema cu e persona tin. No tin excuse pa lanta man.

     

     

     

     

     

    - Advertisement -

    DUNA COMENTARIO

    Please enter your comment!
    Please enter your name here