Home Enseñanza Hoben desespera y cu deseo grandi di por haya su permiso pa...

Hoben desespera y cu deseo grandi di por haya su permiso pa sigui studia

1864
0
SHARE
- Advertisement -

El a dirigi carta abierta na Minister Bikker 

ORANJESTAD (AAN)- Na redaccion di DIARIO un hoben cu un mente sumamente positivo y cu kier logra su metanan den bida, pero pa motibo di permiso e no por drenta scol EPI e aña escolar aki.

Adhunto e carta cu e hoben Maniesha Ferney cu a bin Aruba cu su 11 aña a bay scol sin permiso y awo cu e tin 19 aña e no por sigui studia pa motibo di permiso.

“Aan de Minister van Justitie en Integratie

Andin Bikker

L.G. Smith Boulevard 76

297+ 528 4900

Apreciabel Mr. Bikker,

Mi nomber ta Maniesha Ferney.  Mi ta  manda e carta aki cu un mente desespera.  Mi ta  fada. Cu 11 aña di edad mi a scapa e terremoto na mi pais di origen, Haiti.

Esaki lo ta un carta informal. Mi ta pidi disculpa pa esey, pero pa esey so tamb’e. Mi lo ta contando mi historia. Mi no por keda keto mas.

Mi a pasa tres dia abou di un cas sin nada. Sin come, sin bebe. Mi a wordo clasifica manera morto. Mi mes a pensa cu mi lo a muri ey bao.

Prome cu esey a pasa, Dios a baha su man y a yudami. Nan a sacami di ey bao.

Tres aña despues, mi tata a haya chens pa sacami di Haiti pa mi por bin Aruba pa un bida y un futuro mihor. Mi a laga mi wela y mi welo atras.

Mi tin 5 aña sin wak nan. Cada vez nan yamami riba telefon, nan ta corda mi di esaki. Nan ta bisami “B’a bai laga nos. Nos tey muri sin wak bo pa ultimo biaha.” Mi a laga tur cos atras pa un bida mihor y mi ta sinti man’e mi mannan ta mara.
Mi a bin aki nan oficialmente riba 21 di Augustus den anja 2013.

Mi a cuminsa bay scol e proximo dia mes. Desde cu mi a bin ki nan, un di mi prome prioridadnan tabata mi estudio y pa regel mi papelnan di legalidad. Cada biaha mi tabata bay Dimas pa saca mi permiso, mi tabata wordo nenga. Door cu mi ta un mucha cu ta kere den educacion, sin permiso mi a sigui pa dilanti. Cu un seguro di estudiante di LIsle & Sons Insurance Brokers N.V, mi tabata paga 1,600,- AWG pa aña pa por studia riba e isla.

Despues di basis, mi mester a bai MAVO. Door cu e tabata te na San Nicolas y mi no tabata tin suficiente pa placa di bus, mi a dicidi di bai EPB 2de Niveau. Cuatro aña despues, m’a haal mi Diploma bunita.

Mi tabata traha on the side mientras mi tabata bai scol, y despues mi tabata traha tamb’e mientras mi tabata stage. Tur e esfuerzo aki tabata pa por mantene mi mes y mi famia. Pa por paga mi scol, mi seguro y pa por sigui adilanti. Ami tin cu hasi tur mi vueltanan. Ningun hende ta yudami. Mi tata a bisami cu mi mester siña defende mi mes pa mi por sobrevivi. Y asina mi a haci. Mi tin mi Diploma den mi man. Mi ta mas cu cualifica pa bai EPI, pero door cu mi no tin mi permiso mi no por bai EPI.

Nan lo ponemi ripiti EPB un aña mas te ora mi tin mi permiso den mi man. Mi a traha asina duro pa e Diploma ki pero no pa mi mes so, si no pa mi Tata tamb’e. Mi tata ta malo, e ta trahando part time awo. Cos tabata preta antes, pero awo el a bira sofocante. Mi ciudad di origen ta Dessalines. Mi pais ta Haiti. Mi a laga mi bida atras pa por bin ki nan, mi a sigui e ley y mi a hasi tur cos acuerdo di loke Dimas ta bisa y te ainda ningun hende por yudami cu nada. Mi ta mandando Meneer Bikker e carta ak’i paso mi ta desespera.

Please yudami. Mi soño ta pa yuda mi ouders, pa yuda mi welonan y pa yuda mi tata. Mi soño ta pa caba EPI cu un diploma di Hospitality & Tourism den management. Mi soño ta pa bay studia na Canada of Francia, door cu mi ta papia Frances. Mi kier pusha pa dilanti pero tur cos cu a pasa cu mi te awo y tur e dolor cu mi mester a wanta den mi bida ta dunando mi e idea cu mi ta destina pa biba un bida yena di yen mala suerte. Ta birando mas duro pa keda positivo.

Sin e permiso aki mi mannan ta mara. Mi kier djis sigui mi scol. Please Mr. Bikker, yudami. Mi number di paspoort ta AR4760572. Mi tin 19 aña. Mi nomber ta Maniesha Ferney. Mi ta mas cu mi number di paspoort. Mi ta un humano. Mi merece un chens di por bringa pa mi futuro. Please yudami logra esak’i paso lok’e Dimas ta hasiendo cu mi no ta husto. Mi ta cansa. “

Maniesha Ferney
297+ 6304384

 

- Advertisement -

DUNA COMENTARIO

Please enter your comment!
Please enter your name here