Hopi hende ta kere cu $35 miyon ta yuda cu nada pa prepara Refineria na San Nicolas

    331
    0
    SHARE
    - Advertisement -

    ORANJESTAD (AAN): E suma principal cu tin mester pa e refineria na San Nicolas ta completamente operacional atrobe, ta como 800 miyon Dollar.

    Grandi tabata sorpresa di hopi experto, ora cu nan a mira ehecutivonan di Citgo ta manera bin tira santo den wowo di pueblo, y haci un show pa mustra cu nan lo bay start cu Fase 2… usando solamente $35 miyon.

    Cu e $35 miyon ey, nan kier aparenta cu nan ta bay revisa tur equipo den refineria, controla nan, y emplea entre 150 pa 170 trahador adicional.

    Pues di e suma di 800 miyon cu mester tin pa tur esaki, ta pone apenas 4% y pico pa bay haci trabao di preparacion?

    Pesey mes riba Diaranzon, ta hopi hende a cuestiona e suma ey pa bay start Fase 2.

    “Cu e suma di $35 miyon, kizas bo por djis kita frustro di 2 tanki, of verf 4 tanki, haci algun paperwork, y ta cla,” un observador local a bisa.  E suma ey ta djis un druppel cu ta evapora mas rapido compara cu ora lechi ta mezcla den un copi di coffie.

    Pa colmo Citgo ta den noticia mundial aworaki, ora cu un Huez Federal a duna luz berde pa companianan pone beslag riba dje.  Pero ta ser splica cu $35 miyon ta bin for di Venezuela.

    Hopi experto local tin hopi duda den e capacidad di Citgo pa cuminza back cu e refineria na San Nicolas.   Esaki ta e pensamento di hopi hende, pasobra nan no tin ningun indicacion cu tin “movimento” den e instalacion di e refineria na San Nicolas.  Djis pasobra riba e tereno no tin hende, no tin trahador, tin nada.  Tur cos ta status quo na San Nicolas.

    Y mientras tanto, tur hende bulando pipa, y tin ningun indicacion cu e ta moviendo den bon direccion.  Ta djis bo tin puro hende cana rond y papia cos cu no ta cuadra cu realidad.

    Hecho ta, cu tanten e compania no presenta cu mucho mas placa, bo no tin indicacion concreto cu e rehabilitacion di e refineria ta riba schedule.  Pa colmo awor cu a sali na cla cu companianan na Merca por pone beslag riba Citgo.

    “Cu e miserable $35 miyon aki, ta duda cu Fase 2 por wordo logra.  Loke nan a bay haci na Gobierno ta djis un show, djis un smokescreen, y actua comosifuera nan ta bay habri.”  Pasobra tur hende sa cu aworaki Citgo na Merca bayendo di malo pa peor.

    Corda cu pa Citgo, nan no por perde Aruba, pasobra e refineria ta ultimo chens pa chica placa.  Y hopi hende ta duda cu nan lo por logra haya e 800 miyon Dollar aki pa start e refineria.

    Kizas e $35 miyon cu nan ta bay gasta, kizas ta destina pa haci mas estudio?  Pasobra ni pa un feasibility-study mes pa un refineria, e suma no ta yega.

    Tin un diferencia grandi entre 35 miyon y 800 miyon!  Citgo ta bay aplica e placa na unda?  Y kico ta bay yuda pa mantene trabao.  Of ta djis un pantomina pa gaña Gobierno y pueblo y gana tempo.

    Tambe tin e duda cu Citgo lo por haya financiamento pa e resto di placa.  Pasobra aworaki cu Merca tin sancion poni na cantidad riba cabez di PDVSA, hopi kier sa di unda e placa lo bin.

    Fuera di esey, e lo por hinca Aruba den problema cu Washington tambe relaciona cu e violacion di sancionnan.

    Si acaso Citgo di berdad ta usando $35 miyon pa Fase 2 y bay prepara equipo e luna aki… y aki cuatro luna ainda e Refineria no a start up back… Ta parce cu e 35 miyon aki ta placa benta afo.

     

    - Advertisement -

    DUNA COMENTARIO

    Please enter your comment!
    Please enter your name here