Home General Hopi placa a wordo desperdicia na Elmar cu consentimento di director Henriquez

Hopi placa a wordo desperdicia na Elmar cu consentimento di director Henriquez

272
0
SHARE
- Advertisement -

ORANJESTAD  (AAN): Presidente di Sindicato STA, Diego de Cuba, ta elabora riba e reunion cu a tuma luga entre Sindicato STA y e trahadornan di Elmar.

De Cuba ta splica cu Sindicato STA a reuni cu trahadornan di Elmar pa informa nan riba e situacion cu ta andando.

Sindicato STA a reuni caba cu bureau di Prome Minister y nan a elabora hopi riba e situacion relaciona cu e ex director di Elmar. Nan a pidi Sindicato STA pa compila datonan pa specifica e motibo pakico Sr. Henriquez no por keda como director di Elmar mas.

Sindicato STA a entrega nan un cantidad di motibo. Tambe den e ultimo reunionnan cu Directiva di Elmar y ekipo investigador, nan a entrega documentonan cu ta indica cosnan cu ta haci hopi daño na e compania.

De Cuba ta sigur cu e Directiva nobo y e ekipo investigador lo compronde e mensahe di e dos sindicatonan, esta Alfast y STA. Sindicato STA tin un deber di informa su miembronan riba e situacion cu ta andando.

Nan a vocifera na e director cu ta manehando Elmar actualmente, Sr. Maduro, cu ta deseo di Sindicato STA pa re-negocia e contrato colectivo, cual ta un punto hopi importante, pasobra tin hopi cambio cu nan kier trece a base di locual e trahadornan ta desea.

A informa nan miembronan tambe tocante e situacion actual pa loke ta trata e schorsing di Sr. Henriquez y e dos coleganan.

Adicionalmente, e comunicado di prensa cu a bisa cu e rapport di e ekipo forensico ta cla no ta berdad. E Directiva y Sr. Maduro a confirma cu Elmar no a ricibi ningun rapport oficial. E ekipo forensico mester a haci nan investigacion, saca nan conclusion, traha nan rapport y entrega esaki bek na Directiva di Elmar, cual nunca a sosode.

Hopi placa a wordo desperdicia den Elmar y den opinion di Sindicato STA esaki tabata un sucedido innecesario cu consentimento di sr. Henriquez. Nan a trece tur esaki dilanti pa e ekipo investigador, kendenan mester caba cu nan investigacion y traha nan rapport. Mester dicidi con ta bay termina e contrato di sr. Henriquez.

E dos sindicatonan a splica Directiva bon cla cu Sr. Henriquez no por bolbe asumi e posicion di director, pasobra e disturbio y desunion laboral cu el a crea den e compania aki ta hopi grave. Si un persona kier actua na un forma dictatorial, e mester pensa dos of tres biaha prome e haci esey.

E hendenan cu e ta traha cun’e ta forma parti di su ekipo pa maneha e compania. Pues pa bay constantemente contra di nan conseho ta inaceptabel. Sr. De Cuba ta enfatisa cu si Sr. Henriquez sali ileso di e investigacion aki, niun hende kier e toch den e compania pa motibo di e disturbio y desunion laboral cu e ta trece na e compania. E no ta normal y e no ta sano pa un compania di vital importancia pa Aruba.

De Cuba ta spera cu e Directiva y e ekipo investigador caba cu nan tareanan y pronto por sinti un aire fresco ta supla atrobe den NV Elmar.

 

- Advertisement -

DUNA COMENTARIO

Please enter your comment!
Please enter your name here